श्रीलंकाको कोलोम्बोमा आज सुरु भएको एसीसी इमर्जिंग टिम्स एसिया कप अन्तर्गत पहिलो दिन सम्पन्न दुईवटा खेलमा आयोजक श्रीलंका ए र अफगानिस्तान ए विजयी भएका छन्।
श्रीलंका ए ले बंगलादेश ए लाई ४८ रनले तथा अफगानिस्तान ए ले ओमान ए लाई ७२ रनले पराजित गर्यो।
सिन्हालिज स्पोर्ट्स क्लबमा श्रीलंकाले दिएको ३५० रनको लक्ष्य पछ्याउने क्रममा बंगलादेशले ४८.३ ओभरमा ३०१ रन बनाउन सक्यो। प्लेयर अफ द म्याच घोषित श्रीलंकाका ओपनर अभिस्का फर्नान्डोले १३३ रन बनाए। बलिंगतर्फ प्रमोद मदुशान र दुशान हेमन्थाले ३/३ विकेट लिए।
कोलोम्बो क्रिकेट मैदानमा अफगानिस्तानले दिएको २६८ रनको लक्ष्य पछ्याएको ओमानले ४०.३ ओभरमा १९५ रन मात्र बनाउन सक्यो। प्लेयर अफ द म्याच घोषित अफगानिस्तान ओपनर जुबेद अकबरीले ७९ रन बनाए भने बलिंगमा मोहम्मद इब्राहिम र जिया उर् रहमानले ३/३ विकेट लिए।
प्रतियोगिता अन्तर्गत नेपालले आफ्नो पहिलो खेल भोलि शुक्रबार पाकिस्तान ए संग कोमोम्बो क्रिकेट क्लब मैदानमा खेल्ने छ। खेल नेपाली समय १०:१५ बजे बिहान सुरु हुनेछ। भोलिनै भारत ए ले युएई ए संग सोहि समयमा खेल्नेछ।
प्रतियोगितामा नेपाल सहित ८ देशहरु सहभागी छन्। नेपाल समुह ‘बि’ मा छ जुन समुहमा टेस्ट राष्ट्र भारत ‘ए’ , पाकिस्तान ‘ए’ र युएई ‘ए’ टिम छन्। समुह ‘ए’ मा अफगानिस्तान ‘ए’ , श्रीलंका ‘ए’ , बंगलादेश ‘ए’ र ओमान ‘ए’ छन्। समुह चरणमा सबै टिमले एक अर्कासंग १/१ खेल खेलेपछि समुहको उत्कृस्ट दुई टिम सेमीफाइनल पुग्नेछन्।
नेपाली टिम : रोहित पौडेल ( कप्तान ), आसिफ शेख, अर्जुन साउद, कुशल भुर्तेल, कुशल मल्ल, पवन सर्राफ, देव खनाल, गुल्सन झा, सोमपाल कामी, भीम सार्की, श्याम ढकाल, प्रतिस जिसी, ललित राजवंशी, किशोर महतो, सन्दीप जोरा र सूर्य तामाङ
नेपालको खेल तालिका :
१४ जुलाई : विरुद्ध पाकिस्तान ‘ए’
१७ जुलाई : विरुद्ध भारत ‘ए’
१९ जुलाई : विरुद्ध युएई ‘ए’