मलेसियामा आज सुरु भएको एसीसी अन्डर-१९ प्रिमियर कप प्रतियोगिता अन्तर्गत नेपालले विजयी सुरुवात गर्ने क्रममा इरानलाई २७४ रनको विशाल अन्तरले पराजित गरेको छ।
बाँगी स्थित वाईएसडी युकेएम ओभल मैदानमा सम्पन्न खेलमा नेपालले दिएको ३५४ रनको लक्ष्य पछ्याएको इरानले ३०.५ ओभरमा ७९ रनमा सबै विकेट गुमायो।
देब्रे हाते स्पिनर दिपेश कंडेल र अफ स्पिनर सुबास भण्डारीले ३/३ तथा दुई दायाँ हाते पेसर हेमन्त धामी र आकाश चन्दले २/२ विकेट लिंदै इरानको इनिंग्स समाप्त गारे। इरानको लागि ओपनर अमेर खोरसन्दले सर्वाधिक ३७ रन योगदान दिए।
यस अघि टस हारेर ब्याटिंग गरेको नेपालले ४०.१ ओभरमा सबै विकेट गुमाएर ३५३ रन बनायो।
ओपनर अर्जुन कुमाल खाता नखोली पहिलो बलमा आउट भएपछि आकाश त्रिपाठी पनि ३ रन बनाएर आउट भए। त्यसपछि ओपनर दिपक बोहरा ( क ) र देव खनालले शतकीय साझेदारी गर्दै नेपालको पारि उकासे। दुवैले तेश्रो विकेटको लागि १६६ रनको साझेदारी गरे।
यु-१९ राष्ट्रिय टिमबाट दोश्रो शतक बनाउने क्रममा देवले ६० बलमा १२ चौका र ४ छक्का मद्दतले १०० रन बनाए। उनले ५९ बलमा शतक पुरा गरे भने लगत्तै फुल टस बलमा लामो सट खेल्न खोज्दा क्याच आउट भए। खनालले यसै वर्ष फेब्रुअरीमा आयोजित यु-१९ विश्वकप एसिया छनोटमा कुवेत विरुद्ध शतक ( १२५ ) रन बनाएका थिए। नेपालको अन्डर-१९ टिमको लागि खेल्दै दुई शतक बनाउने देव पहिलो खेलाडी हुन्।
ओपनर बोहराले ५९ बलमा ६५ तथा दिपक डुम्रेले ४४ बलमा ६९ रन बनाए। दिपेश कंडेलले २९, हेमन्त धामीले २३ तथा आकाश चन्दले १९ रन बनाए।
इरानको बलिंगमा सलमान नियाजमन्द र दद्राहमन रेसीले ३/३ तथा जेड रेसी र समान शेखीले २/२ विकेट लिए।
प्रतियोगिता अन्तर्गत नेपालले दोश्रो खेल बहराईनसंग अक्टोबर १५ मा तथा तेश्रो खेल अक्टोबर १९ मा साउदी अरबसंग खेल्ने तालिका छ।
प्रतियोगितामा कुल १६ टिम सहभागी छन्। सहभागी टिमहरुलाई ४ वटा समुहमा बिहाजन गरिएको छ। नेपाल समुह ‘ए’ मा छ जुन समुहमा बहराईन, साउदी अरब र इरान छन्। समुह ‘बि’ मा युएई, ओमान, कतार र चिन छन्। समुह ‘सी’ मा सिंगापुर, कुवेत, थाइल्याण्ड र माल्दिभ्स छन्। समुह डी मा हंगकंग, मलेसिया, जापान र इन्डोनेसिया छन्।
समुह चरणमा सबै टिमले एकअर्कासंग १/१ खेल खेलीसकेपछि चारवटै समुहबाट उत्कृस्ट हुने टिमहरूले सेमीफाइनल खेल्नेछन्।
