घरेलु टोलि श्रीलंकालाई ६० रनले पराजित गर्दै अफगानिस्तानले तिन खेलको एकदिवसीय अन्तर्राष्ट्रिय सिरिजमा १-० को अग्रता लिएको छ।
पालेकेले स्टेडियममा सम्पन्न खेलमा अफगानिस्तानले दिएको २९५ रनको लक्ष्य पछ्याएको श्रीलंकाले ३८ ओभरमा २३४ रनमा सबै विकेट गुमायो।
श्रीलंकन ओपनर पथुम निसंकाले सर्वाधिक ८५ तथा वानिन्दु हसरंगाले ६६ रन बनाए। दुई बाहेक अन्य ब्याट्सम्यान लामो समय क्रिजमा जम्न सकेनन्। धनन्जय डी सिल्भा र दासुन शनाकाले समान १६ रन बनाए।
अफगानिस्तानको बलिंगमा फजलहक फारुकीले ४ विकेट लिए जुन क्रममा ९ ओभरमा ४९ रन खर्चिए। गुल्बदीन नैबले ३, यामिन अहमदजाईले २ तथा राशिद खानले १ विकेट लिए।
टस जितेर ब्याटिंग गरेको अफगानिस्तानले ५० ओभरमा ८ विकेट क्षेतीमा २९४ रन बनायो।
अफगानिस्तान ओपनर इब्राहिम जद्रानले करियरको दोश्रो शतक बनाए जुन क्रममा १०६ रन बनाए। उनले १२० बलमा ११ चौका प्रहार गरे। अर्का ओपनर रहमनुल्लाह गुर्बजले ५३ बनाए। रहमत शाहले ५२, नजिबुल्लाह जद्रानले ४२ तथा गुल्बदीन नैबले २२ रन बनाए।
जद्रानले गुर्बजसंग ८४ रनको ओपनिंग तथा दोश्रो विकेटको लागि रहमतसंग ११८ रनको साझेदारी गरे।
श्रीलंकाको बलिंगमा वानिन्दु हसरंगाले २ विकेट लिंदा कसुन रजिथा, धनन्जय लक्षन, लाहिरु कुमारा र महेश तिक्षनाले १/१ विकेट लिए।
सिरिज अन्तर्गत दोश्रो र तेश्रो खेल नोभेम्बर २७ र नोभेम्बर ३० तारिखमा हुनेछ।
