- विकेटनेपाल, पौष-४, बुधबार
एभरेस्ट प्रिमियर लिग टि-२० अन्तर्गत जारि इलिमिनेर खेलमा पहिले ब्याटिंग गर्दै चितवन टाइगर्सले २० ओभरमा ८ विकेट गुमाएर १३९ रनको योगफल तयार गरेको छ।
खेलमा बिजयी हुने टिमले दोश्रो क्वालीफायरमा काठमाडौँ किंग्स-११ संग प्रतिस्पर्धा गर्नेछ जसको विजेताले शनिवार खेलिने फाइनलमा ललितपुर प्याट्रीएट्ससंग खेल्नेछ। काठमाडौँ पहिलो क्वालीफायरमा ललितपुर प्याट्रीएट्ससंग पराजित भएको थियो।
खेलमा टस हारेर फिल्डिंग गर्ने क्रममा चितवनको सुरुवात राम्रो हुन सकेन। सन्दिप सुनार ( ४ रन ) दोश्रो ओभरमा रायन टेन डेस्काटेकको बलमा मिड अनमा अविनाश बोहराको हातबाट क्याच आउट भए। त्यसपछि लगत्तै ओभरमा ७ बलमा २ चौका र १ छक्का प्रहार गर्दै १४ रन बनाएका अर्का ओपनर पल स्टरलिङ्गलाई मोहम्मद नबिदले क्याच आउट गराए।
पाँचौ ओभरमा कप्तान पृथु बास्कोटा ११ बल खेल्ने पनि खाता नखोल्दै नबिदकै बलमा आउट हुँदा चितवन २४/३ ( ४.३ ओभर ) को अवस्थामा पुग्यो।
चौथो नम्बरमा आएका जोन सिम्पसन र दिपेन्द्र ऐरिले चौथो विकेटको लागि ३१ रनको साझेदारी गर्दै इनिंग अघि बढाए पनि सिम्पसन १४ रन ( १५ बल, २ चौका ) बनाएर नवौं ओभरमा भुवन कार्कीको सिकार भए।
पाँचौ विकेटको लागि दिपेन्द्र ऐरिले भिम शार्कीले २० रनको साझेदारी गरे पछि भिम ९ रन बनाएर आउट भए। त्यसपछि ऐरिले जर्ज स्कटसंग २० रनको साझेदारी गरे। स्कट ९ रन मा आउट हुँदा टाइगर्सले छैठौं विकेट गुमायो। शार्की र स्कटको विकेट अविनाश बोहराले लिए।
लगातार अर्को किनारमा विकेट गुमे पनि दिपेन्द्र ऐरिले एउटा किनार सम्हाल्दै अर्धशतक पुरा गरे। रायन टेन डेस्काटेले गरेको १७ औं ओभरमा लगातार ४ चौका प्रहार गर्दै त्यसै ओभरमा कुल १९ रन बटुल्दै उनले प्रतियोगितामा दोश्रो अर्धशतक पुरा गरे। यस अघि ऐरिले पोखरा राइनोजसंग अविजित ५४ रन बनाएका थिए।
अर्धशतक बनाए पछि ऐरि ५६ रन बनाएर मोहम्मद नबिदको बलमा १९ औं ओभरमा आउट भए। कमल सिंह ऐरि त्यसपछि १३ रन बनाएर आउट भए भने अन्तिममा ललित भण्डारी ४ रन बनाएर अविजित रहे।
फलस्वरुप चितवनले २० ओभरमा ८ विकेट गुमाएर १३९ रनको योगफल खडा गर्यो।
भैरहवाको बलिङ्गमा युएई क्रिकेटर समेत रहेका मोहम्मद नबिदले ३ विकेट लिन ४ ओभरमा २४ रन खर्चिए। यस्तै अविनाश बोहराले २ विकेट ( ४-०-१३-२ ) लिए भने रायन टेन डेस्काटे, कृष्ण कार्की र भुवन कार्कीले समान १/१ विकेट लिए।
चितवन टाइगर्स प्लेयिंग-११ : पृथु बास्कोटा ( कप्तान ) , ललित सिंह भण्डारी , सन्दिप सुनार , शाहब आलम , दिपेन्द्र सिंह ऐरि , भिम शार्की, कमल सिंह ऐरि, सागर ढकाल, जर्ज स्कट, जोन सिम्प्सन, पल स्टरलिङ्ग
भैरहवा ग्ल्याडीएटर्स प्लायिंग-११ : शरद भेसावकर, आरिफ शेख, रोहित पौडेल, कृष्ण कार्की, भुवन कार्की, प्रदिप ऐरि, अविनाश बोहरा, क्कुशल मल्ल, रभी इन्दर सिंह, रायन टेन डेस्काटे, मोहम्मद नबिद
