- विकेटनेपाल, असोज २० – रौतहट
रौतहट प्रिमियर लिग टि-२० प्रतियोगिता अन्तर्गत शनिबार क्वार्टरफाइनल खेलहरु सम्पन्न भएका छन्।
पहिलो क्वार्टर-फाइनलमा धनगढी क्रिकेट एकेडेमीलाई मलपोखरी क्रिकेट क्लबले पराजित गर्यो भने दोश्रो क्वार्टर-फाइनलमा ओएसीस क्रिकेट एकेडेमीले रौतहट-११ लाई पराजित गर्दै सेमी-फाइनलमा स्थान बनाएका छन्।
पहिलो क्वार्टरफाइनल : धनगढी मलपोखरीसंग निराश
टस जितेर ब्याटिंग गरेको धनगढीले १९.२ ओभरमा ११८ रनमा सम्पूर्ण विकेट गुमाउन पुगेपछि ११९ रनको लक्ष्य मलपोखरीले १४.१ ओभरमा १ विकेट मात्रै गुमाएर भेट्यो।
खराब ब्याटिंग गरेको धनगढीको लागि पवन कार्कीले सर्वाधिक २८ रन तथा दिपेन्द्र थापाले २२ रन योगदान दिएका थिए। कप्तान भुवन कार्की ( ० ) र राजु रिजाल ( २ ) सस्तैमा आउट हुन पुग्दा धनगढीले ठुलो योगफल बनाउन सकेन। मलपोखरीको लागि कमल खति र कमल ओलीले समान ३/३ विकेट हात पारे।
लक्ष्य पछ्याउने क्रममा खडक बोहराले अविजित ५९ तथा सोहन यादबले ३२ रन बनाएर मलपोखरीलाई सजिलै लक्ष्यसम्म पुर्याएका थिए। खडकले ४५ बलमा २ छक्का र ५ चौका प्रहार गरे जो खेलको प्लेयर अफ द म्याच समेत चुनिन पुगे।
दोश्रो क्वार्टरफाइनल : आलमको धारिलो बलिङ्गमा ओएसीसको जित
टस जितेर ब्याटिंग रोजेको रौतहट-११ ले २० ओभरमा सम्पूर्ण विकेट गुमाएर मात्र ८४ रन बनाउन सक्यो। ८५ रनको लक्ष्य ओएसीसले १४ ओभरमा ६ विकेट गुमाएर पुरा गर्यो।
ओएसीसको जितमा बलिङ्गतर्फ कीर्तिमानी राष्ट्रिय क्रिकेटर मेहबुब आलम ( ४-१-७-३ ) र पुष्प थापा ( ४-०-१२-३ ) ले ३/३ विकेट हात पारे।
लक्ष्य पछ्याउने क्रममा हरि चौहानले सर्वाधिक अविजित २० रन बनाए भने सुरज पटेलले १९, मेहबुब आलमले १४ रन योगदान दिए। रौतहट-११ बलर जितेन्द्र मुखियाले ३ विकेट लिए पनि जित दिलाउन भने सकेनन्।
मेहबुब आलम खेलको प्लेयर अफ द म्याच समेत चुनिए।
प्रतियोगिता अन्तर्गत आइतबार हुने क्वार्टरफाइनल खेलहरुमा नेपाल पुलिस क्लब र नेक्सस क्रिकेट एकेडेमी तथा महाकाली क्रिकेट एकेडेमी तथा वाईवाई ग्रेट हिमालय क्रिकेट एकेडेमीले प्रतिस्पर्धा गर्नेछन्।
