काठमाडौं – ३ खेलको टि२० सिरिजका लागि स्कटल्याण्ड भ्रमणमा रहेको अस्ट्रेलियाले एक खेल अगावै सिरिज जितेको छ । दोस्रो टि२० मा स्कटल्याण्ड माथि ७० रनको सानदार जित निकालेको हो ।
पहिलो खेल ७ विकेटले जितेको पाहुना टोलीले यो जितसँगै सिरिज २-० ले १ खेल अगावै जितेको छ । अस्ट्रेलियाले दिएको १ सय ९७ रनको लक्ष्य पछ्याएको स्कटल्याण्ड १६.४ ओभरमा अल आउट हुदै १ सय २६ रन मात्र बनाउन सक्यो ।
टोलीका लागि ब्रेन्डन म्याकमुलनले ४२ बलमा ४ चौका र ४ छक्काको सहयोगमा ५९ रन जोडे । ओपनर जर्ज मुन्सेले ९ बलमा १९ रन बनाउदा अन्य ब्याटरले दोहोरो अंकमा रन जोड्न सकेनन् । अस्ट्रेलियाका लागि मार्कस स्टोइनसले ४, क्यामरन ग्रीनले २ तथा सन एबोट, जेभियर बार्टलेट, एडम जाम्पा र आरोन हार्डिले समान १ विकेट लिए ।
त्यसअघि टस हारेर ब्याटिङ गरेको अस्ट्रेलियाले निर्धारित २० ओभरमा ४ विकेट गुमाएर १ सय ९६ रन जोडेको थियो ।
अस्ट्रेलियाका लागि विकेटकिपर जोस इङ्ग्लिसले ४९ बलमा ७ चौका र ७ छक्काको सहयोगमा १ सय ३ रनको शतकीय इनिङ खेले । उनले अस्ट्रेलियाका लागि टि२० आईमा सबैभन्दा कम बलमा शतक बनाउने कीर्तिमान बनाए ।
इङ्ग्लिसले ४३ बलमा शतक पूरा गर्दै यो कीर्तिमान आफ्नो नाम गरे । यसअघि यो कीर्तिमान आरोन फिन्च, ग्लेन म्याक्सवेल र इङ्ग्लिसको नाममा रहेको थियो । फिन्चले २०१३ मा इङ्ग्ल्यान्डसँग तथा म्याक्सवेल र इङ्ग्लिसले गत वर्ष भारतविरुद्ध समान ४७ बलमा शतक पूरा गरेका थिए ।
क्यामरन ग्रीनले २९ बलमा ३६, मार्कस स्टोइनेसले नट आउट २० तथा टिम डेबिडले नट आउट १७ रन जोडे । स्कटल्याण्डका लागि ब्राड करीले ३ तथा क्रिस सोलले १ विकेट लिए । दुई टोलीबीचको तेस्रो खेल शनिवार हुनेछ ।
