स्कटल्याण्डमा जारी आईसीसी विश्वकप लिग-२ अन्तर्गतको त्रिकोणात्मक एकदिवसीय सिरिजमा नेपालको सुरुवात हारबाट भएको छ। नेपाललाई नामिबियाले ४० रनले पराजित गर्दै लिस्ट ए क्रिकेटमा नेपाल बिरुद्ध पहिलो जित दर्ता गर्यो।
स्कटल्याण्डको न्यु काम्बसडुन मैदानमा नामिबियाले दिएको २२१ रनको लक्ष पछ्याउने क्रममा नेपालले ४६.५ ओभरमा १८० रन मात्र बनायो। स्कोरकार्ड
नेपालको लागि आरिफ शेखले सर्वाधिक योगदान दिने क्रममा अविजित ५० रन बनाए जुन क्रममा ८४ बलमा २ चौका प्रहार गरे। देव खनालले ३४, कुशल भुर्तेलले २७, करन केसीले १९, आसिफ शेखले १४ रन बनाए।
नेपालले आठौँ ओभरमा पहिलो विकेट गुमाएता पनि त्यसपछि लगातार विकेट गुमायो। ओपनर कुशल र आसिफको विकेटपछि देव खनाल क्रिजमा जमेता पनि रोहित पौडेल खाता नखोली तथा दिपेन्द्र ऐरी ४ रन बनाएर आउट भए। रोहित रन आउट भए। पाँचौ विकेटको लागि देव र आरिफले ४५ रनको साझेदारी गरे जुन इनिंग्समा सर्वाधिक साझेदारी रह्यो। त्यसपछि अरिफ शेखले एक किनार सम्हालेता पनि अर्को किनारमा नेपालको विकेट जाने क्रम रोकिएन। आरिफले करियरको चौंथो एकदिवसीय अन्तर्राष्ट्रिय अर्धशतक पुरा गरेता पनि उनलाई साथ दिने ब्याट्सम्यान नहुँदा नेपाल पराजित भयो।
नामिबियाको बलिंगमा डेभिड विजा, बर्नार्ड स्कल्ज र जान फ्राईलिंकले २/२ विकेट तथा रुबेन ट्रंपलमान र जेरहार्ड इरास्मसले १/१ विकेट लिए।
टस जितेर ब्याटिंग गरेको नामिबियाले ४७.३ ओभरमा सम्पूर्ण विकेट गुमाएर २२० रन बनायो।
नामिबियाको लागि जान निकोलले सर्वाधिक ६० तथा डिभान ला ककले ४१ रन योगदान दिए। सन्दिप लामिछानेले उत्कृस्ट बलिंग गर्दा माथिल्लो क्रमका ब्याट्सम्यानहरु आउट हुँदा ९८ रनमा ४ विकेट गुमाएको अवस्थामा निकोलले मध्यक्रमका ब्याट्सम्यानहरुसंग साझेदारी गर्दै ४५ औं ओभरसम्म ब्याटिंग गरे। निकोललाई सोमपाल कामीले आफ्नै बलमा क्याच आउट पारे।
नेपालको बलिंगमा कप्तान सन्दिप लामिछानेले सर्वाधिक ४ विकेट लिए जुन क्रममा १० ओभरमा ५४ रन खर्चिए। सोमपाल कामिले २ विकेट ( ७-०-४४-२ ) लिंदा डेब्यु गरेका बसिर एहमद, करन केसी र दिपेन्द्र ऐरीले १/१ विकेट लिए।
सिरिज अन्तर्गत नेपालले आगामी खेल बुधबार ( जुलाई १३ ) घरेलु टोलि स्कटल्याण्डसंग खेल्नेछ।
हारपछि नेपाल विश्वकप लिग-२ अंकतालिकामा एक स्थान तल झर्दै छैठौं स्थानमा पुगेको छ भने नामिबिया पाँचौ स्थानमा उक्लेको छ। नेपालले १७ खेलमा ७ जित र ९ हार बेहोरेको छ भने १ खेल बराबरीमा टुंगिएको थियो। हेर्नुस अंकतालिका
