- विकेटनेपाल, पुष १ गते
एभरेस्ट प्रिमियर लिग टि-२० अन्तर्गत आइतबार एक मात्र खेलमा शरद भेसावकर कप्तानीको भैरहवा ग्ल्याडीएटर्स र ज्ञानेन्द्र मल्ल कप्तानीको ललितपुर प्याट्रीएट्स प्रतिस्पर्धा गर्दैछन्। दुवै टिमको यो लिग चरणको अन्तिम खेल हो।
लिगको अंकतालिकामा दुवै टिमले ४/४ खेल खेल्दा दुबै टिमले ३ जित र १ हार बेहोर्दै ६ अंक बटुलेको छ भने समान खेल र नतिजा सहित काठमाडौँ किंग्स पनि रहेको छ। बलियो नेट रनरेट सहित ललितपुर ( १.६२२ ) तालिकाको पहिलो स्थानमा रहेको छ भने दोश्रो स्थानमा भैरहवा ( ०.११ ) र तेश्रो स्थानमा काठमाडौँ ( -०.६९९ ) सहित रहेको छ।
ललितपुर र भैरहवा बीच विजयी हुने टिमलेनै लिगको शिर्ष स्थानमा आउने सम्भावना रहेकोले दुवै टिमले यसलाई महत्वपूर्ण खेलको रुपमा लिएका छन्। खेल दिउसो १ बजे सुरु हुनेछ।
प्रतियोगितामा भैरहवा
लिगको पहिलो खेलमा भैरहवाले पोखरा राइनोजलाई ४ विकेटले पराजित गरेको थियो। दोश्रो खेलमा चितवनलाई १२ रनले पराजित गरेपछि लगातार तेश्रो जित दर्ता गर्ने क्रममा बिराटनगर वारीयर्सलाई ४ विकेटले पराजित गरेको थियो। चौथो खेलमा जितको लय गुमाएको भैरहवा काठमाडौँ किंग्स ११ संग ७ विकेटले पराजित भएको थियो।
टिमको उत्कृस्ट खेलाडी – रभी इन्दर सिंह
भैरहवाका बिदेशी खेलाडी रभी इन्दर सिंह उत्कृस्ट लयमा छन् र प्रतियोगिताकै धेरै रन बनाउने सुचीमा शिर्ष स्थानमा रहेका छन्। ४ खेलमा १ शतक र १ अर्धशतक बनाएका उनले १२४ को औशतले कुल २४८ रन बनाएर टिमको सफलतामा महत्वपूर्ण भूमिका खेलीरहेका छन्। यस क्रममा उनले पोखरा राइनोज बिरुद्ध प्रतियोगिताकै १ मात्र शतक प्रहार गर्ने क्रममा १२५ रन ( ६० बल, ८ चौका र १० छक्का ) बनाएका थिए।
प्रतियोगितामा ललितपुर
प्रतियोगिताको पहिलो खेलमा बिराटनगर वारियर्ससंग ३ विकेटले पराजित भएपछि ललितपुर प्याट्रीएट्सले चितवन टाइगर्सलाई ११ रनले, पोखरा राइनोजलाई ८ विकेटले र काठमाडौँ किंग्स ११ लाई १० विकेटले पराजित गरिसकेको छ।
टिमको उत्कृस्ट खेलाडी – गौरभ तोमर
लगातार रन बनाईरहेका तोमरले ४ खेलमा विस्फोटक ब्याटिंग गर्दै १९६ रन बनाईसकेका छन्। यस क्रममा उनले काठमाडौँ किंग्स ११ बिरुद्ध अविजित ८० रन, पोखरा राइनोज बिरुद्ध ८२ रन र चितवन टाइगर्ससंग ३० रन बनाएका छन्। बलिङ्ग याक्सनका कारण बलिङ्ग गर्न भने प्रतिबन्ध भोगेका उनले बिराटनगर वारियर्ससंग ३ विकेट लिएका थिए।
