भारत र न्युजिल्यान्ड बीच इंग्ल्यान्डमा जारि आईसीसी वर्ल्ड टेस्ट च्याम्पियनसिपको फाइनल खेल अन्तर्गत तेश्रो दिनको लन्च ब्रेकको खेल समाप्त भएको छ।
लन्च ब्रेकसम्म भारतले पहिलो इनिंग्समा ८९ ओभर ब्याटिंग गर्दा ७ विकेट गुमाएर २११ रन बनाएको छ। तेश्रो दिनको सुरुवात १४६/३ को अवस्थाबाट सुरु गरेको भारतले पहिलो सेसनमा थप ४ विकेट गुमाउन पुग्यो ६५ रन योगफलमा जोड्न सक्यो। ब्याटिंग गर्न गार्हो देखिएको पिचमा क्रिजमा जम्न ब्याट्सम्यानहरुलाई निकै गार्हो देखिएको छ।
दिनको सुरुवातमा ४४ रन बनाएका कोहली र २९ रन बनाएका रहाने लामो समय क्रिजमा जम्न सकेनन्। कोहलीलाई कायल जेमीसनले एलबिडब्लु आउट गरे जस अघि उनले १३२ बलमा १ चौका मद्दतले ४४ रन बनाए। कोहलीको विकेट पछि रिशभ पन्तलाई पनि जेमीसनले मात्र ४ रनको व्यक्तिगत स्कोरमा पेभेलियन फर्काए। अर्धशतक बनाउन १ रनले चुक्दै रहाने निल वाग्नरको बलमा क्याच आउट भए। रहानेले ११७ बलमा ५ चौका मद्दतले ४९ रन बनाए।
रहानेको विकेटपछि रभीचन्द्रन आश्विनले २७ बलमा ३ चौका मद्दतले २२ रन बनाउदै योगफल २ सय पार गराए। आश्विनलाई टिम साउदीले स्लिपमा क्याच आउट गराए।
सेसनको समाप्तिमा क्रिजमा रभीन्द्र जडेजा १५ रन तथा इशान्त शर्मा २ रन बनाएर खेलीरहेका छन्।
न्युजिल्यान्डको बलिंगमा कायल जेमीसनले ३ विकेट ( २०-१२-२६-३ ) लिएका छन् भने निल वाग्नरले २ विकेट ( १५-५-४०-२ ) तथा टिम साउदी ( २२-६-६४-१ ) र ट्रेन्ट बोल्ट ( २०-४-४६-१ ) ले समान १ विकेट लिएका छन्।
टेस्टमा भारतले टस हारेर ब्याटिंग गरिरहेको छ। टेस्टको पहिलो दिन वर्षाको कारण रद्द भएको थियो।
