अस्ट्रेलियाको मेलबर्नमा जारी बिग ब्यास लिग प्रतियोगिताको फाइनलमा नेपाली स्पिनर सन्दिप लामिछानेले कसिलो बलिङ्ग गरेका छन्।
मेलबर्न रेनेगेड्स र मेलबर्न स्टार्स बीच जारि फाइनल खेलमा स्टार्सले टस जितेर बलिङ्ग रोजेको हो।
खेलको पहिलो इनिंग सकिदा मेलबर्नले २० ओभरमा ५ विकेट गुमाएर १४५ रनको योगफल तयार गरेको हो। रेनेगेड्सको लागि ब्याटिंगमा टम कुपरले अविजित सर्वाधिक ४३ रन बनाउने ४५ बलमा २ चौका र २ छक्का प्रहार गरे। यस्तै ड्यानियल क्रिस्टीएनले ३८ रन बनाउन ३० बलमा २ चौका र १ छक्का प्रहार गरे।
रेनेगेड्स कुनै बेला ६५/५ को अवस्थामा थियो जसपछि ड्यानियल र टमले छैठौं विकेटको लागि ८० रनको साझेदारी गर्दै टिमलाई सम्मानजनक योगफल तर्फ डोर्याए।
स्टार्सको बलिङ्गमा ज्याक्सन बर्ड र एडम जाम्पाले २/२ विकेट लिए। बर्डले ३ ओभरमा २५ तथा जाम्पाले ४ ओभरमा २१ रन खर्चिए। सन्दिप लामिछाने सहित अन्य बलर विकेट विहिन रहे।
सन्दिप लामिछानेले आफ्नो स्पेलमा विकेट विहिन हुनु परे पनि ४ ओभरमा मात्र १६ रन खर्चिएका हुन्।
सन्दिपले आफ्नो पहिलो ओभर सातौँ ओभरमा गर्ने क्रममा पहिलो ओभरमा मात्र २ रन खर्चिएका थिए जुन क्रममा उनले ४ वटा डट बल गरे भने २ वटा सिंगल दिए।
लगत्तै स्पेलमा दोश्रो ओभर बलिङ्ग गर्न आएका सन्दिपले ६ रन खर्चिए। नवौं ओभरको पहिलो बलमा म्याकेन्जी हार्भेले चौका प्रहार गरेका थिए जसपछि ओभरमा २ रन मात्र दिए।
त्यसपछि १२ औं ओभरमा आफ्नो तेश्रो ओभर बलिङ्ग गर्ने क्रममा सन्दिपले मात्र ३ रन खर्चिएका थिए। ओभरमा ३ बल डट र ३ वटा सिंगल दिए।
१५ औं ओभरमा अन्तिम ओभर गर्ने क्रममा सन्दिपले ६ रन खर्चिए जुन क्रममा ओभरमा ४ वटा सिंगल र एउटा डबल रन दिए।
कुल ४ ओभर उनले १६ रन खर्चेर विकेट विहिन रहे।
