विकेटनेपाल, चैत्र २१ – बुधबार । धनगढी प्रिमियर लिग अन्तर्गत आजको पहिलो खेलमा बाबर हयातले आक्रामक पारि खेलेपछि बिराटनगर किंग्सले रुपन्देही च्यालेंजर्सलाई ४२ रनले पराजित गर्दै दोश्रो खेलमा पहिलो जित प्राप्त गरेको छ । यसअघि आइतबार भएको खेलमा बिराटनगर महेन्द्रनगर युनाईटेडसँग ३३ रनले पराजित भएको थियो (बिस्तृत विवरण) ।
टस हारेर पहिले ब्याटिंग गरेको बिराटनगरले २० ओभरमा ४ विकेट गुमाएर १८१ रनको योगफल तयार पारेको थियो । उसका लागि बाबर हयातले ५८ रनको पारि खेल्नेक्रममा ३५ बलमा १ चौका र ४ छक्का हानेका थिए । त्यो भन्दा अगाडी दिलिप नाथले ४३ रन र अनिलकुमार शाहले ३६ रन बनाउँदै पहिलो विकेटको लागि ४५ रनको साझेदारी गरेका थिए ।
माथिल्लोक्रमको ब्याट्सम्यानहरुको योगदानलाई निरन्तरता दिंदै पारस खड्काले १२ बलमा २२ रन र सौरभ खनालले ११ बलमा अविजित १७ रन प्रहार गर्दै पारीको उत्कृस्ट अन्त्य गरे ।
रुपन्देहीका सबै बलर कमजोर साबित भएको खेलमा ओमानका रास्ट्रीय खेलाडी साफ्यन मेहमूदले २ विकेट लिन ३९ रन खर्चिए भने सागर पुन र जितेन्द्र मुखियाले १/१ विकेट लिए ।
जवाफमा १८२ रनको लक्ष्य पछ्याएको रुपन्देहीका लागि प्रदिप ऐरीले अघिल्लो खेलको प्रदर्शनलाई निरन्तरता दिंदै ५४ रन बनाउन ५० बलमा ६ चौका र २ छक्का प्रहार गरेपनि अन्य खेलाडीहरुको साथ नहुँदा २० ओभरमा ७ विकेट गुमाएर १३९ रनमात्र बनाउन सक्यो ।
बिराटनगरका सुभम कामतले ३ विकेट लिन १८ रन तथा रामनरेश गिरिले २ विकेट लिन २७ रन खर्चेका थिए ।
टिमलाई जित दिलाउन महत्त्वपुर्ण भूमिका खेलेका बिराटनगरका खेलाडी बाबर हयात म्यान अफ द म्याच घोषित भए ।
