पोखरा प्रिमियर लिग अन्तर्गत पाँचौ दिनको दोस्रो खेलमा बिराटनगर टाईटन्स र बुटवल ब्लासटर्स भिड्दै छन्। बिराटनगरको कप्तानी सन्दिप लामिछानेले गर्दैछन् भने बुटवल सोमपाल कामीको कप्तानीमा रहेको छ।
पहिलो इनिंगको समाप्तिमा टस जितेर ब्याटिंग गरेको बिराटनगर टाईटन्सले ७ विकेट गुमाएर १४० रनको योगफल तयार गरेको छ। टाईटन्सका लागि पाकिस्तानी खेलाडी मोहम्मद जैद आलमले सर्वाधिक ७२ तथा प्रदिप ऐरीले ४१ रनको योगदान गरे।
![Md. Zaid Alam](https://wicketnepal.com/wp-content/uploads/2018/10/IMG_1523-1024x683.jpg)
दोस्रो ओभरको दोस्रो बलमानै ललित भण्डारीले सुनिल धमलालाई पभेलियनको बाटो देखाएपछि बिराटनगरको सुरुवात राम्रो हुन सकेको थिएन। मात्र ३६ रन जोड्न दुई विकेट गुमाएको बिराटनगरको इनिंगलाई जैद आलम र प्रदिप ऐरीको साझेदारीले उकासेको थियो।
जैद र प्रदिपले तेस्रो विकेटका लागि ६७ रनको साझेदारी गर्दै बिराटनगरको इनिंगलाई उकासेका थिए। जैदले ४५ बलमा ६ चौका र ५ छक्का प्रहार गर्दा ७२ रन जोडे। यस्तै प्रदिपले भने ४३ बलमा ३ चौका सहित ४१ रन जोडे।
जैद र प्रदिप बाहेक अन्य ब्याट्समेनहरुले दोहोरो अंकमा रन जोड्न सकेनन्।
![Lalit Bhandari](https://wicketnepal.com/wp-content/uploads/2018/10/IMG_1363-1024x683.jpg)
बुटवलको बलिङ्गतर्फ ललित भण्डारीले सर्वाधिक २ विकेट (२.३ -०-१६-२) हात पारे। यस्तै बिपिन खत्री, संसाद शेख र सागर पुनको नाममा समान १-१ विकेट रह्यो।