काठमाडौं, चैत ६ – क्याम बेस्ट–११ ले दोस्रो संस्करणको किङ्सटन रनिङ सिल्डमा सोमबार जेनएक्स–११ लाई ३ ले हराउँदै विजयी सुरुआत गरेको छ ।
क्याम युथ एसोसिएसन अस्ट्रेलियाको आयोजनामा सिड्नीमा भएको डे नाइट ट्वान्टी–२० क्रिकेट प्रतियोगितामा क्याम बेस्ट–११ ले सुखद सुरुआत गरेको हो । १ सय ३७ रनको लक्ष्य पछ्याएको जेनएक्स १८.१ ओभरमा १ सय ३३ रनमा नै समेटिएपछि क्याम बेस्टले रोमाञ्चक जित निकाल्यो ।
जेनएक्सका रोनीले ११ बलमा ३१ रन जोडे पनि आफ्नो टोलीलाई जित दिलाउन सकेनन् । नानीले १६ रन र अरुणले ११ रन बनाए । जेनएक्सलाई सस्तैमा रोक्न क्याम बेस्ट–११ का अमनले चार ओभरमा दुई विकेट लिँदै ११ रन मात्र खर्चिए । अनुपले दुई विकेटनै निकाल्दै अलराउन्ड प्रदर्शन गरे । दिवेशले पनि दुई विकेट नै लिए ।
त्यसअघि ब्याटिङ गरेको क्याम बेस्टले निर्धारित २० ओभरमा ९ विकेट गुमाउँदै १ सय ३६ रनको मध्यम योगफल बनाए पनि जितका लागि पर्याप्त बन्यो । अनुपले २७ रन, साहिलले २१ रन र उमेशले ११ रन बनाए । सतीशले उत्कृष्ट बलिङ गर्दै चार ओभरमा चार विकेट लिए । उनले १७ रन मात्र खर्चिए ।
भूपीन्दर र एरमानको नाममा समान दुई विकेट रह्यो । प्रमुख अतिथि रजिस्टर्ड माइग्रेसन एजेन्ट रमेशराज शर्माले प्रतियोगिताको उद्घाटन गरेका थिए ।
दोस्रो सिजनको प्रतियोगितामा कुल १६ टोलीले प्रतिस्पर्धा गरिरहेका छन् । उक्त प्रतियोगिताको खेलहरू ब्रेसिङ्टन पार्क, साउथ एभर्ली पार्क र नर्थ एभर्ली पार्कमा हुनेछन् ।
क्याम युथ एसोसिएसनले अस्ट्रेलियाको सिड्नीमा नेपाली समुदायमाझ पहिलोपटक क्लब डे नाइट क्रिकेट प्रतियोगिता आयोजना गरेको हो । ‘हामी सँगै गर्न सक्छौं’ नाराका साथ जारी प्रतियोगिता जुनको मध्यसम्म चल्नेछ । खेलहरू प्रत्येक सप्ताहान्तमा हुनेछन् । नेपाली समुदायलाई क्रिकेटमार्फत चिनाउने उद्देश्यका साथ प्रतियोगिता आयोजना गर्न लागिएको प्रतियोगिताका निर्देशक मुस्कान पाण्डेले बताए । विजेताले ६ हजार र उपविजेताले दुई हजार अस्ट्रेलिया डलर पुरस्कार पाउने निर्देशक पाण्डेले जानकारी दिए ।
प्लेयर अफ दी सिरिजले पाँच सय डलर तथा अन्य विधाका उत्कृष्ट खेलाडीले पनि आकर्षक पुरस्कार पाउने आयोजकले जनाएको छ । प्रतियोगितालाई किङ्सटन इन्स्टिच्युट अस्ट्रेलियाले मुख्य प्रायोजन गरेको छ । गत सिजन प्रतियोगिताको उपाधि बुद्ध भूमि क्रिकेट क्लबले जितेको थियो ।
