दोश्रो खेलमा नेपाललाई ८३ रनले पराजित गर्दै घरेलु टिम क्यानडाले दुई खेलको सिरिज १-० ले आफ्नो पक्षमा पारेको छ। पहिलो खेल वर्षाको कारण रद्द भएको थियो। स्कोरकार्ड
ओन्टारियो स्थित किंग सिटि मैदानमा क्यानडाले दिएको १८९ रनको लक्ष पछ्याउने क्रममा नेपालले ३९.२ ओभरमा १०५ रनमा सबै विकेट गुमायो। नेपालको लागि तेश्रो नम्बरमा ब्याटिंग गरेका देव खनालले सर्वाधिक २६ रन योगदान दिए। ओपनर पवन सर्राफले १४ तथा बसिर एहमद, बिनोद भण्डारी र आदील अन्सारीले समान १३ रन बनाए। ३७ रनमै सुरुवाती ५ विकेट गुमाएपछि नेपालको विकेट जाने क्रम कुनै पनि बेला थामीएन।
क्यानडाका सबै पाँच बलर अमर खालिद, सलमान नजर रोमेल शाहजाद, साद बिन जाफर र हर्ष थाक्ररले २/२ विकेट लिए।
टस हारेर ब्याटिंग गरेको क्यानडाले ५० ओभरमा ९ विकेट क्षतिमा १८८ रन बनायो। उसको लागि नवौं नम्बरका ब्याट्सम्यान श्रेयस मोब्भाले अविजित ५० रन बनाए। ओपनर आरोन जोन्सनले ४४ तथा एघारौँ नम्बरका ब्याट्सम्यान अमर खालिदले अविजित ३० रन बनाए।
११८ रनमा ९ विकेट गुमेको अवस्थाबाट दशौँ विकेटको लागि मोब्भा र खालिदले अविजित ७० रनको साझेदारी गर्दै जितको आधार तयार गरे। दुवैले १२ ओभर ब्याटिंग गर्दै नेपाली बलरलाई विकेट दिएनन्।
नेपालको बलिंगमा कप्तान सन्दिप लामिछानेले सर्वाधिक ३ विकेट लिए भने दिपेन्द्र सिंह ऐरीले २ तथा किशोर महतो, करन केसी, आदील आलम र बसिर एहमदले १/१ विकेट लिए।
विश्वकप लिग टू अन्तर्गत स्कटल्याण्डमा आयोजना हुने त्रिकोणात्मक एकदिवसीय सिरिज अघि नेपालले क्यानडाको भ्रमण गरेको हो । यस अघि नेपाली टोलीले स्थानीय ओन्टारियो क्लबसँग दुई अभ्यास खेल खेलेको थियो । दुबै खेल नेपालले जितेको थियो।
क्यानडामा सिरिज खेलेर नेपाली टोली उतैबाट नेपाल, स्कटल्यान्ड र नामिबिया सम्मिलित आईसीसी विश्वकप लिग–२ त्रिदेशीय सिरिज खेल्न स्कटल्यान्ड जानेछ । स्कटल्यान्डमा नेपालले पहिलो खेल नामिबियाविरुद्ध जुलाई ११, दोस्रो खेल स्कटल्यान्डविरुद्ध जुलाई १३, तेस्रो खेल नामिबियाविरुद्ध जुलाई १६ र अन्तिम खेल स्कटल्यान्डविरुद्ध जुलाई १७ मा खेल्नेछ ।
