- विकेटनेपाल, मङ्सिर १५ – शनिबार
पाँचौ सिजनको सेन्चुरी बैंक कर्पोरेट क्रिकेटको उपाधि सेन्चुरी बैंकले जितेको छ। त्रिभुवन विश्वबिद्यालय क्रिकेट मैदान किर्तिपुरमा शनिबार सम्पन्न रोमान्चक फाइनल खेलमा एनआईसी एसिया बैंकलाई ३ विकेटले पराजित गर्दै सेन्चुरीले दोश्रो पटक प्रतियोगिताको उपाधि जितेको हो।
एसएस इभेन्ट्स द्वारा आयोजित प्रतियोगिताको सन् २०१६ को संस्करणमा सेन्चुरीले उपाधि जितेको थियो भने गत बर्षको विजेता सिभिल बैंकले भने यो पटक प्रि-क्वार्टरफाइनलसम्मको मात्रै यात्रा गर्यो। अघिल्लो सिजन सेन्चुरी सेमीफाइनलमा सिभिल बैंकसंग पराजित भएको थियो।
शनिबारनै सम्पन्न सेमीफाइनल खेलमा सेन्चुरीले भारतीय राजदुतावासलाई ५ विकेटले तथा दोश्रो सेमीफाइनलमा एनआईसी एसियाले सुबिसुलाई ९ रनले पराजित गर्दै फाइनलमा स्थान बनाएको थियो।
फाइनल खेलमा टस जितेर एनआईसी एसिया बैंकले पहिले ब्याटिंग गर्दै ५ ओभर ७६ रनको योगफल तयार गरेको थियो। उसको लागि सन्दिप कार्कीले अविजित ३१ रन ( १२ बल, ५ चौका , १ छक्का ) , सन्जोग शर्माले २४ रन ( ८ बल, ३ चौका , १ छक्का ) बनाएका थिए।
जवाफमा सेन्चुरीले विजयी लक्ष्य १ बल बाँकी छदा भेट्यो। लक्ष्यसम्म पुग्न लागि सुबास शर्माले सर्वाधिक २१ रन बनाए जुन क्रममा ८ बलमा २ छक्का प्रहार गरे। यस्तै प्लेयर अफ द फाइनल घोषित बिष्णु तिवारीले अविजित १९ रन बनाउने क्रममा ७ बलमा ३ चौका र १ छक्का हिर्काए। दिपेन कार्कीले २ तथा सुमित श्रेष्ठले १ विकेट लिए पनि एनआईसीलाई जित दिलाउन सकेनन्।
उपाधिसंगै सेन्चुरीले विजयी ट्रफी प्राप्त गर्यो भने आगामी बर्षको लागि निशुल्क प्रवेश समेत पाएकोछ। प्रतियोगिताको उत्कृस्ट खेलाडी सेन्चुरीका सुरज तिमल्सिना घोषित भए जसले कुल ११२ रन बनाउनुको साथै २ विकेट लिएका थिए। उनले रु १० हजार पाउनुको साथै हिसेन्सको तर्फबाट ३२ इन्चको कलर टिभी प्राप्त गरे।
यस्तै बेस्ट ब्याट्सम्यान सुबिसुका रोजन्स प्रधान ( कुल ११४ रन ) घोषित भए भने उत्कृस्ट बलर एनआईसी एसिया बैंकका सुमित श्रेष्ठ ( कुल ६ विकेट ) घोषित भए। यस्तै बेस्ट फिल्डर सन राइज बैंकका केदार सिंह तथा उत्कृस्ट विकेट किपर सेन्चुरीका सुबास शर्मा घोषित भए। उत्कृस्ट बलर र ब्याट्सम्यानले रु. १० हजार प्राप्त गरे भने सबै विधाका उत्कृस्ट खेलाडीहरुले चिरायु हस्पिटलको तर्फबाट मेडिकल प्याकेज पुरस्कार स्वरुप पाए।
विजेता खेलाडीहरुलाई समापन समारोहका प्रमुख अतिथि पुर्व उप-प्रधानमन्त्रि तथा गृह मन्त्रि बामदेव गौतम, सेन्चुरी बैंकका अध्यक्ष राजेश कुमार श्रेष्ठ लगायतले पुरस्कार प्रदान गर्नुभयो। मङ्सिर १० देखि सुरु भएको प्रतियोगितामा कुल २३ टोलिको सहभागिता रहेको थियो।
