चितवनमा जारी प्रथम भरतपुर मेयर कप तीन दिवसीय क्रिकेट प्रतियोगितामा पाहुना टोली मकवानपुर २२५ रनको लक्ष्य पछ्याउँदै जवाफी व्याटिङ गरिरहेको छ ।
दोस्रो दिनको समाप्तीमा मकवानपुर ५ विकेटको क्षतिमा ६० रन बनाएको छ । भोलि अन्तिम दिन जितका लागि मकवानपुरलाई १६५ रनको आवश्यकता छ भने उसको साथमा ५ विकेट रहेको छ । क्रिजमा आकाश घिमिरे ९ र सूर्वण भट्ट ५ रनमा अविजित छन् ।
चितवनका गौतम केसीले ७ ओभरमा २१ रन खर्चिएर ३ विकेट लिएका छन् भने कृजन गुरुङले ४ ओभरमा १३ रन खर्चिएर २ विकेट लिए ।
पहिलो इनिङमा मकवानपुर १३८ रनमा अलआउट भयो । उसका लागि रामनरेश गिरीले ३१ र गौरव खड्काले २९ रन बनाए । पहिलो इनिङमा चितवनका लागि कृजन गुरुङले १४ ओभरमा २८ रन खर्चिएर ५ विकेट लिए भने गौतम केसीले १०.४ ओभरमा २ विकेट लिए ।
३८ रनले लिड गरेको चितवनले दोस्रो इनिङमा १८६ रनमा अलआउट भयो । चितवनका लागि प्रतिक श्रेष्ठले ८३ र विकल गुप्ताले ३७ रन बनाए । मकवानपुरका रामनरेश गिरीले ३२ रन खर्चिदै ६ विकेट लिए भने पियुश शर्माले १४ ओभरमा ४२ रन खर्चिदै २ विकेट लिए । पहिलो इनिङमा गिरीले ५ विकेट लिएका थिए । नारायणी एडर्भटाइजिङ एण्ड इभेन्ट्स प्रा.लि.को आयोजनामा जारी प्रतियोगिता भोलि (शनिबार) सम्म चल्नेछ । त्यसलगत्तै भरतपुर मेयर कप एकदिवसीय क्रिकेट प्रतियोगिता सुरु हुनेछ ।
प्रतियोगितालाई भरतपुर महानगरपालिकाले प्रवद्र्धन गरेको छ भने चितवन जिल्ला क्रिकेट संघले सहयोगी भूमिका निर्वाह गरेको छ ।