- विकेटनेपाल – १७ कार्तिक, शनिवार (पोखरा)
पोखरा प्रिमियर लिग अन्तर्गत लिग चरणको अन्तिम खेलमा बिराटनगर टाईटन्स र चितवन राइनोज भिड्दै छन्। दोस्रो चरण प्रवेशका लागि चितवनलाई जितको खाँचो छ भने बिराटनगर प्रतियोगिताबाट बाहिरिसकेको छ।
शनिवारको दोस्रो खेलमा टस जितेर ब्याटिंगमा उत्रिएको बिराटनगरले निर्धारित २० ओभरमा ५ विकेट गुमाएर १४५ रनको योगफल तयार गरेको छ।
बिराटनगर बिरुद्ध जित निकालेमा चितवनको सिधा फाइनल प्रवेश गर्ने सम्भावना रहने छ। यस्तै चितवन हारेको खण्डमा भने धनगढीले शिर्ष ३ मा आफ्नो स्थान बनाउने छ।
बिराटनगरको इनिंगमा जैद आलमले सर्वाधिक ५१ तथा सुनिल धमलाले ४७ रनको योगदान गरे। आलमको प्रतियोगितामा यो लगातार तेस्रो अर्धशतक समेत हो।
ओपनिङ्ग गर्न उत्रिएका जैदले ४७ बलमा ६ चौका र २ छक्का सहित ५१ रन जोडे। त्यसक्रममा उनले सुनिल धमलासंग पहिलो विकेटका लागि ८७ रनको साझेदारी गरेका थिए।
सुनिल व्यक्तिगत ४७ रनको स्कोरमा स्मित पटेलको शिकार बने। ४५ बल खेलेका सुनिलले ७ चौका प्रहार गरे।
यस्तै पुस्प थापाले अविजित ११, प्रदिप ऐरी ११ र राजेश पुलामीले ८ रन जोडे।
चितवनको बलिङ्गमा स्मित पटेल र पारस खड्काको नाममा समान २-२ विकेट रह्यो। आ-आफ्नो ४ ओभरको स्पेलमा पारस र स्मितले क्रमश २९ र २७ रन खर्चिए।
