काठमाडौं। हङकङमा हुने चारदेशिय टी–२०आई क्रिकेट सिरिज खेल्न जाने नेपाली टोलीको बिदाइ गरिएको छ।
नेपाल क्रिकेट संघ (क्यान)ले सोमबार टोलीको बिदाइ गरेको हो। यस्तै, क्यानले नियुक्त गरिसकेको भनिएका मुख्य प्रशिक्षक स्टुअर्ट ल अझै नेपाल आइपुगेका छैनन्। त्यसैले नेपालले ९ देखि १३ अप्रिलसम्म हुने सिरिज उनीबिना नै खेल्ने भएको हो।
नेपाली टिम भने पूर्वकप्तान ज्ञानेन्द्र मल्लले सम्हाल्ने भएका छन्। उनले पछिल्लो समय नेपाल ‘ए’ क्रिकेट टिम सम्हालेका थिए।
सिरिजमा नेपाल र घरेलु टोली हङकङसहित कतार र कुवेतले सहभागिता जनाउने छन्। नेपालले बिहिवार कतारसँग खेल्दै प्रतियोगिताको सुरुआत गर्नेछ।
दोस्रो खेल अप्रिल १० मा कुवेत र तेस्रो तथा अन्तिम खेल अप्रिल १२ मा हङकङसँग खेल्नेछ। लिग चरणमा शीर्ष दुई टोलीले फाइनल खेल्ने छन्। तेस्रो र चौथो स्थानमा रहने टोलीले तेस्रो स्थानका लागि प्रतिस्पर्धा गर्नेछन्।