विश्व क्रिकेटका महान फास्ट बलर डेल स्टेनले सबै किसिमको क्रिकेटबाट सन्यास लिने घोषणा गरेका छन्।
३८ वर्षीय दक्षिण अफ्रिकी खेलाडीले १७ वर्षीय करियरको अन्त्य ट्वीटर पोस्ट मार्फत गरेका हुन्।”जुन खेललाई म सर्वाधिक मन पराउछु त्यो खेलबाट म अधिकारिक रुपमा खेल सन्यास लिंदैछु। तितो र मिठो तर धन्य छु। धन्यवाद सबैलाई, मेरो परिवार र साथी खेलाडीहरु, पत्रकार, फ्यानहरुलाई यो यात्रामा साथ दिनु भएकोमा।” स्टेनले लेखेका छन्।
देशको लागि ९३ टेस्ट, १२५ एकदिवसीय र ४७ टि-२० खेलेका स्टेन अब दक्षिण अफ्रिकी जर्सीमा देखिने छैनन्। उनले टेस्टमा ४३९, एकदिवसीयमा १९६ र टि-२० मा ६४ विकेट लिएका थिए।
Announcement. pic.twitter.com/ZvOoeFkp8w
— Dale Steyn (@DaleSteyn62) August 31, 2021
आफ्नो गति र स्विंगको लागि विश्वप्रसिद्ध बलरले अस्ट्रेलिया बिरुद्ध अन्तिम पटक अन्तर्राष्ट्रिय खेल खेलेका थिए। घरेलु टि-२० सिरिजमा उनले गत वर्ष २०२० फेब्रुअरीमा अन्तिम पटक खेल खेलेका थिए। उनि २०१९ एकदिवसीय विश्वकप अघि घाइते भएपछि प्रतियोगिताबाट बाहिर भएका थिए। त्यसपछि उनले टेस्ट र एकदिवसीयबाट सन्यास घोषणा गरेका थिए। स्टेन २०१० देखि २०१३ सम्म टेस्ट नम्बर-१ बलर रहेका थिए जो २०१५ मा पुनः नम्बर-१ स्थानमा पुगेका थिए।
सन् २००४ डिसेम्बरमा इंग्ल्यान्ड बिरुद्ध टेस्ट डेब्यु गरेका स्टेनले २००५ मा एसिया-११ बिरुद्ध पहिलो एकदिवसीय अन्तर्राष्ट्रिय खेलेका थिए। २०१९ मा श्रीलंका बिरुद्ध खेलिएको एकदिवसीय उनको करियरको अन्तिम एकदिवसीय अन्तर्राष्ट्रिय रह्यो।