- विकेटनेपाल, माघ-३ , बिहिबार
राष्ट्रिय टिमबाट गत वर्ष एकदिवसीय बिश्व कप छनौटबाट बाहिरिएपछि निरन्तर खराब फर्ममा रहेका ब्याट्सम्यान दिलिप नाथले शतक बनाए पछि मनमोहन कप एकदिवसीय क्रिकेट प्रतियोगितामा नेपाल पुलिस क्लबले क्षेत्र नम्बर-७ लाई पराजित गर्दै फाइनलमा स्थान पक्का गरेको छ।
सुनसरीको इनरुवामा सम्पन्न खेलमा पहिले ब्याटिंग गरेको पुलिसले ५० ओभर ब्याटिंग गर्दै ८ विकेट गुमाएर ३२३ रनको योगफल तयार गरेको थियो।
पुलिसको लागि तेश्रो नम्बरमा ब्याटिंग गरेका देब्रे हाते दिलिपले १२५ बलमा ५ छक्का र ९ चौका प्रहार गर्दै अविजित ११५ रन बनाए।
ओपनर अमित श्रेष्ठ ११ र सुनिल धमला १० रन बनाएर आउट भएपछि दिलिपले प्रेम तामांग, योगेन्द्र कार्की, कुशल भुर्तेल र मन्जित श्रेष्ठसंग ब्याटिंग गर्दै ५० ओभरसम्म ब्याटिंग गरे। ३० रनको योगफलमा २ विकेट गुमाएपछि दिलिपले प्रेम तामांगसंग तेश्रो विकेटको लागि ६९ रनको, चौथो विकेटको लागि योगेन्द्र कार्कीसंग ४८ रनको, कुशल भुर्तेलसंग ५८ रनको तथा मन्जित श्रेष्ठसंग ८० रनको साझेदारी गरका थिए।
![Dilip Nath](https://wicketnepal.com/wp-content/uploads/2019/01/50259423_227863104812458_3796102631206682624_n.jpg)
प्रेम तामांगले २४, योगेन्द्र कार्कीले २५, कुशल भुर्तेलले २७ रन बनाए भने कप्तान मन्जित श्रेष्ठले विस्फोटक ब्याटिंग गर्दै ३२ बलमा ४ चौका र ४ वटै छक्का मदतले अविजित ५३ रन बनाए।
प्रदेश नम्बर-७ को बलिङ्गमा बिनोद लामा, विकास आग्री र लोकेस बमले २/२ विकेट लिए।
सागर ढकालको उत्कृस्ट बलिङ्ग
यु-१९ राष्ट्रिय क्रिकेटर देब्रे हाते स्पिनर सागर ढकालले एक्लैले ५ विकेट हात पारे पछि प्रदेश-७ ले ३२४ रन लक्ष्य पछ्याउने क्रममा ३१.३ ओभरमा १२३ रनमै सम्पूर्ण विकेट गुमाउन पुग्यो।
पुलिस टिमबाट पहिलो प्रतियोगिता खेलीरहेका ढकालले ९.३ ओभर बलिङ्ग गर्दा २ मेडन ओभर गर्दै मात्र ३० रन खर्चिए। यस्तै राम नरेश गिरि ( ६-०-२०-२ ) र नबिन सिंह थापाले ( ४-०-१८-२ ) २/२ विकेट लिए।
प्रदेश-७ को लागि बिपिन रावलले सर्वाधिक २७ , लोकेस बमले २६ रन तथा नरेन्द्र साउद र नारायण जोशीले समान १६ रन योगदान दिए।
![Sagar Dhakal](https://wicketnepal.com/wp-content/uploads/2019/01/50073199_1998851327074931_22984766592647168_n.jpg)
शनिवार खेलिने फाइनलमा पुलिसले शुक्रबार हुने प्रदेश-१ र त्रिभुवन आर्मी क्लब बीचको विजेतासंग खेल्नेछ।
![](https://wicketnepal.com/wp-content/uploads/2019/01/50255266_578623139267690_8897032845382385664_n.jpg)
माघ ५ गतेसम्म चल्ने प्रतियोगितामा शान्ति दीप नेपाल इनरुवा तथा इनरुवा नगरपालिकाको संयुक्त आयोजना रहेको छ।
प्रतियोगिताको विजेताले उपाधिसँगै रु. ४ लाख १ हजार , उपविजेताले रु २ लाख १ हजार तथा सेमिफाइनलमा पुग्ने टोलीले रु २५/२५ हजार पाउनेछन्। यस्तै उत्कृष्ट खेलाडीले रु ५१ हजार प्राप्त गर्दा उत्कृष्ट बलर र ब्याट्सम्यानले जनही रु २० हजार १०० पुरस्कार पाउनेछन्। अनुशासित टोलीले १५ हजार र उदयमान खेलाडीले १० हजार नगद पाउनेछन्।
( फोटो – विजय कुमार धिताल, व्यवस्थापक – नेपाल पुलिस क्लब )