काठमाडौं । नेपालका अलराउन्डर दीपेन्द्रसिंह ऐरीले एसीसी प्रिमियर कपमा कतारविरुद्धै एकै ओभरमा ६ छक्का प्रहार गरेका छन् ।
दीपेन्द्रले कतारका मिडियम पेसर कमरान खानलाई इनिंग्स अन्तिम ओभरमा ६ छक्का हानेका हुन् । ऐरीले २१ बलमा ३ चौका र ७ छक्कासहित अविजित ६४ रन बनाए ।
दीपेन्द्र नेपालबाट एकै ओभरमा ६ छक्का हान्ने पहिलो नेपाली खेलाडी बनेका हुन् । यसअघि दीपेन्द्रले गत वर्ष २०२३ सेप्टेम्बरमा चिनमा आयोजित एसियन गेम्स अन्तर्गत मंगोलियाविरुद्ध खेलमा दुई फरक ओभरमा लगातार ६ छक्का भने हानेका थिए । तर एकै ओभरमा भने यो नै पहिलो पटक हो । उक्त खेलमा ऐरीले ९ बलमा अर्धशतक बनाउदै अन्तर्राष्ट्रिय क्रिकेटमा सबैभन्दा छिटो अर्धशतकको रेकर्ड आफ्नो नाम गरेका थिए।
अन्तर्राष्ट्रिय क्रिकेटमा यस अघि दक्षिण अफ्रीकाका हर्शल गिब्स, भारतका युवराज सिंह, वेस्ट इन्डिजका काइरन पोलार्ड र जसकरन मलहोत्राले यस अघि एकै ओभरमा ६ छक्का प्रहार गरेका थिए ।
ओमानमा जारि प्रतियोगिता अन्तर्गत खेलमा टस जितेर ब्याटिंग गरेको नेपालले २० ओभरमा ७ विकेट गुमाउँदै २ सय १० रन बनाएको थियो । लक्ष्य पछ्याउने क्रममा कतारले पुरै २० ओभर ब्याटिंग गर्दै ९ विकेट गुमाएर १७८ रन मात्र बनाउन सक्यो।
नेपालको ३२ रनको जितमा कीर्तिमानी प्रदर्शन गरेका दिपेन्द्र प्लेयर अफ द म्याच घोषित भए। ऐरीले बलिंगतर्फ पनि ३४ रन खर्चेर २ विकेट लिए।
