काठमाडौं । टी-२० विश्वकपको लगातार दुई संस्करणमा फाइनलमा स्थान बनाउँने दोस्रो टोली बन्न इंग्ल्यान्डले भारतबाट १ सय ७२ रनको लक्ष्य पाएको छ ।
वेस्ट इन्डिजको गयानामा जारी दोस्रो सेमिफाइनल खेलमा टस हारेर पहिले ब्याटिङ गरेको भारतले निर्धारित २० ओभरमा ७ विकेट गुमाएर १ सय ७१ रन बनायो ।
भारतका लागि कप्तान रोहित शर्माले ३९ बलमा ६ चौका र २ छक्काको सहयोगमा ५७ रनको अर्धशतकीय ईनिङ खेले । सुर्यकुमार यादवले ३६ बलमा ४ चौका र २ छक्काको सहयोगमा ४७ रन बनाए । तेस्रो विकेटका लागि शर्मा र यादवले ५० बलमा ७३ रनको साझेदारी गरे ।
हार्दिक पान्ड्याले १३ बलमा २३ तथा रविन्द्र जडेजाले ९ बलमा अविजित १७ रन बनाए ।
इंग्ल्यान्डका लागि क्रिस जोर्डनले तीन तथा जोफ्रा आर्चर, रिच टोप्ले, साम करन र आदिल राशिदले समान एक एक विकेट लिए ।
इंग्ल्यान्ड लगातार दुई संस्करणमा फाइनल पुग्ने दोस्रो टोली बन्न चाहन्छ । यस अघि २००७ को पहिलो तथा २००९ को दोस्रो संस्करणमा पाकिस्तान लगातार फाइनल पुगेको थियो ।
समूह चरणबाट अपराजित रुपमा सेमिफाइनल पुगेको भारत तेस्रो पटक फाइनल पुग्ने लक्ष्यमा रहेको छ । सन् २००७ मा भएको पहिलो संस्करणको च्याम्पियन भारत २०१४ मा फाइनल पुगेको थियो ।
२०२२ मा भएको अघिल्लो संस्करणको सेमिफाइनलमा भारतलाई १० विकेटले पराजित गरेर इंग्ल्यान्डले फाइनलमा स्थान बनाएको थियो ।
यस खेलको विजेताले पहिलो सेमिफाइनलको विजेता बन्दै फाइनलमा स्थान बनाएको दक्षिण अफ्रिकासँग शनिबार उपाधीका लागि खेल्नेछ ।
