- विकेटनेपाल , २५ साउन
सिंगापुरमा शुक्रबार ( ११ अगस्ट ) देखि सुरु हुने पाँचौ सिंगापुर क्रिकेट क्लब इन्टरनेसनल टि-२० क्रिकेट प्रतियोगिता खेल्न आफु निकै उत्साहित रहेको मेहबुब आलमले बताएका छन् l
आज सिंगापुर प्रस्थान गर्नुअघि विकेटनेपालसंगको कुराकानीमा आलमले आफ्नो मित्र समेत रहेका सिंगापुर रास्ट्रिय क्रिकेटर धार्मिचन्द मुलेवाको निमन्त्रणामा टि-२० प्रतियोगिता खेल्न बोलाएको बताएका छन् l
मेहबुबसंगै पारस खड्का प्रतियोगितामा सिंगापुर इमर्जिंग स्टार टिमबाट खेल्नेछन् l इमर्जिंग स्टार टिममा आईपीएल खेलीसकेका शदाब जकाती र बालचन्द्र अखिल पनि छन् l
“आईपीएल खेलीसकेका खेलाडी पनि मेरै टिमबाट खेल्दैछन् त्यसले झन् उत्साह थपेको छ” आलमले बताए l
जेठ महिनामा सम्पन्न प्रधानमन्त्री कप पछि आलम पहिलो पटक क्रिकेट मैदानमा उत्रनेछन् l मार्चमा केन्यासंग बिश्व क्रिकेट लिग च्याम्पियनसिप र त्यसपछि एसीसी इमर्जिंग टिम्स कपमा नेपाली रास्ट्रिय क्रिकेट टिमको लागि खेलेका आलमको लागि प्रतियोगितामा राम्रो प्रदर्शन गर्दै अन्तर्राष्ट्रिय स्तरमा प्रतिभा देखाउने अवसर रहेको छ l
इमर्जिंग स्टार टिमले आफुलाई ओपनिंग ब्याट्सम्यानको रुपमा खेलाउने योजना बनाएको समेत आलमले खुलासा गरेका छन् –
“प्रतियोगितामा मलाई ओपनिंग ब्याटिंग गर्न आग्रह गरिएको छ जुन मैले स्विकारीसकेको छु”
प्रतियोगिता खेल्न जानु अघि अभ्यास गर्न नपाएकोले भने आलमले चिन्ता ब्यक्त गरेका छन् l राजविराजमा लगातार वर्षाको कारण अभ्यास तथा फिटनेसमा मेहनत गर्ने अवसर नपाएको विकेटनेपाललाई बताए l
अगस्ट ११ देखि १३ सम्म सिंगापुर क्रिकेट क्लबको आयोजनामा हुन लागेको प्रतियोगितामा सिंगापुर इमर्जिंग स्टार टिम सहित अस्ट्रेलियाबाट सिड्नी क्रिकेट क्लब र मेलबर्न क्रिकेट क्लब, दक्षिण अफ्रीकाको रोलिन क्रिकेट क्लब, श्रीलंकाको सिंहालिज स्पोर्ट्स क्लब, हंगकंगको काउलुन क्रिकेट क्लब, भारतको मद्रास क्रिकेट क्लब तथा सिंगापुरको सिंगापुर क्रिकेट क्लब खेल्ने छन् l
श्रीलंकन कीर्तिमानी बलर मुथैया मुरलीधरन पनि स्थानीय टिम सिंगापुर क्रिकेट क्लबबाट प्रतियोगिता खेल्ने छन् l सोहि टोलिबाट अर्का श्रीलंका क्रिकेटर फर्बेज महरुफ तथा अस्ट्रेलियन क्रिकेटर एड कोवान पनि खेल्ने निश्चित भइसकेको छ l
नेपालको समुहमा सिंहालिज स्पोर्ट्स क्लब, मेर्लबर्न क्रिकेट क्लब, र काउलुन क्रिकेट क्लब रहेका छन् l सिंहालिज स्पोर्ट्स क्लबमा श्रीलंकाको लागि खेलीसकेका दासुन शानाका, थिलिना कान्दामबे, जेफ्रे भान्डर्से, धम्मीका प्रसाद, सचित्रा सेनानायके लगायत खेलाडी खेल्ने पक्का भइसकेको छ l यस्तै हंगकंगको काउलुन क्रिकेट क्लबमा हंगकंग रास्ट्रिय क्रिकेट टिमका सदस्यहरुको बाहुल्यता रहेको छ l
सिंगापुर इमर्जिंग स्टार टिमले आफ्नो पहिलो खेल ११ अगस्ट शुक्रबार सिंहालिज स्पोर्ट्स क्लबसंग खेल्ने छ l अगस्ट १२ मा टिमले मर्लबर्न क्रिकेट क्लब र काउलुन क्रिकेट क्लबसंग एकै दिन २ वटा खेल खेल्नेछ l
( फिचर फोटो : फाइल )
