सिन्धुपाल्चोकको पाँचपोखरी थाङपाल गाउँपालिका खेलकुद विकास समितिको आयोजनामा पाँचपोखरी टी-२० जिल्ला स्तरीय क्रिकेट प्रतियोगिता हुने भएको छ ।
आयोजकले बुधबार पत्रकार सम्मेलन गर्दै प्रतियोगिता फागुन १५ गतेदेखि २२ गतेसम्म काठमाडौंको मूलपानी क्रिकेट मैदानमा हुने जानकारी दिएको छ। प्रतियोगितामा सिन्धुपाल्चोक जिल्लाका आठ टिमको सहभागिता रहनेछ । उक्त टिममा सिन्धुपाल्चोक जिल्लावासी मात्र रहने प्रावधान रहेको आयोजकले जनाएको छ ।
प्रतियोगितामा विजेताले नगद ७५ हजार प्राप्त गर्नेछन् । यस्तै उपविजेताले ४० हजार नगद, ट्रफी, प्रमाण पत्र, मेडल पाउने आयोजकले जनाएको छ ।प्रतियोगितामा सर्वोत्कृष्ट खेलाडी, उत्कृष्ट ब्याट्स्म्यान, उत्कृष्ट बलर र उत्कृष्ट अलराउण्डरलाई ट्रफी तथा प्रमाणपत्र प्रदान गरिने समितिका अध्यक्ष टासी शेर्पाले जानकारी दिए ।
यस्तै, प्रतियोगिताको उत्कृष्ट खेलाडीलाई ग्रेट हिमालय क्रिकेट एकेडेमीले एक वर्षका लागि तथा उत्कृष्ट ब्याटर र उत्कृष्ट बलरलाई ६ महिनाको स्कलरसिप प्रदान गर्ने पनि आयोजकले जनाएको छ ।
