धादिङ– धादिङ जिल्ला क्रिकेट संघद्वारा पहिलो पटक आयोजित धादिङ जिल्ला टि-२० प्रतियोतियोगिको उपाधि गजुरी सामुदायिक समाज विकास टिमले जितेको छ। बिहीबार सम्पन्न फाइनलमा गजुरीले त्रिपुरासुन्दरीलाई २१ रनले पराजित गर्यो।
विशालटार स्थित चन्द्रोदय बहुमुखी क्याम्पसको मैदानमा टस जितेर ब्याटिङ रोजेको गजुरी२० ओभरमा १ सय १० रनमा समेटिएको थियो । गजुरीका सविन उप्रेतीले ३४ बलमा ३ चौका सहित सर्वाधिक २८ रनको योगदान दिए । शुरेन्द्र मगरले २६ बलमा १ चौका र २ छक्का प्रहार गर्दै २६ रन बनाए । त्रिपुरासुन्दरीका बलर अनिल अधिकारी ४ ओभरमा १७ खर्चेर २ विकेट लिए । श्रीकृष्ण र उदय थापाले समान १ विकेट लिए।
१ सय ११ रनको लक्ष्य पछ्याएको त्रिपुरासुन्दरीले २० ओभरमा ९ विकेट गुमाउँदै ८९ रन मात्र बनाउन सक्यो । त्रिपुरा सुन्दरीका उदय थापाले सर्वाधिक २१ रन बनाए। गजुरीका मध्य गतिका बलर सानु घले ४ ओभरमा ९ रन खर्चेर घातक बलिङ गर्दै ३ विकेट लिए।
प्रतियोगिता सर्वोत्कृष्ट खेलाडी र उत्कृष्ट बलर गजुरीका उज्वल थापा घोषित भए । गजुरीलाई उपाधि जिताउन उनले प्रतियोगिताभर सर्वोत्कृष्ट अलराउन्ड प्रदर्शन गरेका थिए । उनले प्रतियोगिताभर २ सय ६० रन बनाउनुको साथै १६ विकेट लिएका थिए । प्रतियोगिताको उत्कृष्ट ब्याटर अमृत थापा घोषित भए जसले ५ खेलमा २ सय ३७ रन बनाए। गजुरीकै गजुरीका सक्षम खरेलले युवा उदीयमान खेलाडी घोषित भए । उनले प्रतियोगितामा ५ विकेट लिँदै राम्रो प्रभाव छाडे।
प्रतियोगितामा धादिङ जिल्लाका १४ टिमको सहभागिता थियो । धादिङ जिल्ला क्रिकेट संघको आयोजनामा पहिलो पटक जिल्ला स्तरिय प्रतियोतियोगिता आयोजना भएको थियो । योसँगै च्याम्पियन गजुरीले १ लाख र उपविजेता त्रिपुरासुन्दरीले ५० हजार रुपैयाँ प्राप्त गरेका छन् ।
