काठमाडौं । क्यानडामा जारी ग्लोबल टि ट्वान्टी लिगमा नेपाली क्रिकेट टोलीका कप्तान रोहित कुमार पौडेलआबद्ध टोरोन्टो नेसनल्सको चौथो खेल आज (मंगलबार) रहेको छ ।
रोहित आबद्ध टोरोन्टोले आफ्नो चौथो खेलमा बंग्ला टाईगर्सविरुद्ध खेल्दैछ ।
टोरोन्टो र टाईगर्सबीचको खेल क्यानडाको सिएए सेन्टर, ब्राम्पटनमा नेपाली समय अनुसार मंगलबार राति पौने ९ बाट सुरु हुँदैछ ।
टोरोन्टोले पहिलो र दोस्रो खेलमा जित निकाल्दा तेस्रो खेलमा पराजित हुन पुगेको थियो ।
सोमबार बिहान भएको खेलमा टोरोन्टो सर्रे ज्याकवार्ससँग ८० रनको फराकिलो अन्तरले पराजित भएको थियो । सर्रेविरुद्धको खेलमा रोहितले २५ बलमा १० रन मात्र बनाएका थिए ।
६ टोली सहभागी लिगमा ४ अंकका साथ टोरोन्टो दोस्रो स्थानमा छ । उता, २ खेलमा २ अंकका साथ टाइगर्स पुछारबाट दोस्रो स्थानमा छ ।
