काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेल आबद्ध टोरोन्टो नेसनल्स ग्लोबल टि ट्वान्टी लिगको चौथो संस्करणको च्याम्पियन भएको छ ।
सोमबार बिहान सम्पन्न खेलमा डिफेन्डिङ च्याम्पियन मोन्ट्रियल टाइगर्समाथि ८ विकेटको जितका साथ टोरोन्टोले उपाधी जितेको हो ।
फाइनल खेलमा रोहित भने बेन्चमा रहेका थिए । बेन्चमा रहेपनि १२ औं खेलाडीको रुपमा फिल्डिङ गर्न मैदान उत्रिएका उनले सर्वाधिक रन बनाएका केरबिन बोसलाई रोमारियो शेफर्डको बलमा क्याच आउट गराए ।
टाइगर्सले दिएको ९७ रनको लक्ष्य टोरोन्टोले १५ ओभरमा २ विकेट गुमाएर पूरा गर्यो ।
टोरोन्टोको जितमा आन्द्रेस गौसले अविजित रहँदै सर्वाधिक ५८ रन बनाए । उनले ४९ बलमा ८ चौका प्रहार गरेका थिए । रासी भान डर डुसेनले ३४ बलमा अविजित ३० रन बनाए ।
टाइगर्सका लागि केरबिन बोस र अजमतुल्लाह उमरजाईले समान १ विकेट लिए ।
त्यसअघि टस हारेर पहिले ब्याटिङ गरेको टाइगर्सले निर्धारित २० ओभरमा ९ विकेट गुमाएर ९६ रन बनाएको थियो ।
टाइगर्सका लागि कोरबिन बोसले सर्वाधिक ३५, जसकरण सिंहले १६ तथा अनुप रविले १० रन जोडे ।
टोरोन्टोका लागि जेसन बेहरेनड्राफ्टले ३, रोमारियो शेफर्डले २ तथा जुनैद सिद्धिकी, मोहम्मद नवाज, निखिल दत्त र जितेन्द्रपाल माथरुले समान १ विकेट लिए ।
नेपाली क्रिकेटर आबद्ध भएको टिम च्याम्पियन भएको यो तेस्रो पटक हो । यसअघि २०१९ को दोस्रो संस्करणमा नेपाली क्रिकेट सोमपाल कामी आबद्ध विनिपेक्स हव्स च्याम्पियन भएको थियो । र, २०२३ मा अलराउन्डर दीपेन्द्रसिंह ऐरी आबद्ध मोन्ट्रियल टाइगर्स च्याम्पियन भएको थियो ।
