- विकेटनेपाल, १६ जेठ
प्रधानमन्त्री कप क्रिकेट प्रतियोगिता अन्तर्गत तेश्रो दिनको खेलमा प्रदेश नम्बर-४ ले प्रदेश नम्बर-१ लाई १२९ रनले पराजित गर्ने क्रममा प्रदेश नम्बर-४ का खेलाडी हरि चौहानले नेपाली क्रिकेटमा इतिहास कायम गरेका छन्। चौहानले नेपाली घरेलु क्रिकेटकै इतिहासमा पहिलो पटक एकै खेलमा शतक र ह्याट्रिक लिएका हुन्। स्कोरकार्ड हेर्नुस , बल-बलको अपडेट
खेलमा टस जितेर पहिले ब्याटिंग गरेको प्रदेश नम्बर-४ को लागि चौथो नम्बरमा ब्याटिंग गरेका चौहानले ११५ बलमा १ छक्का र ८ चौका प्रहार गर्दै प्रतियोगिताकै पहिलो शतक प्रहार गरेका थिए। त्यसपछि दोश्रो इनिंगमा चौहानले ४ विकेट लिने क्रममा इनिंगको ३५ औं ओभरको चौथो, पाँचौ र छैठौ बलमा लगातार ३ विकेट लिंदै ह्याट्रिक पुरा गरेका हुन्।
ह्याट्रिक लिने क्रममा उनले फिर्दोश अन्सारीलाई विकेटकिपरको हातबाट क्याच आउट, मनोज तामांगलाई एलबिडब्लु तथा अभ्यास तिमिल्सिनालाई बोल्ड गरेका थिए। उनले खेलमा कुल ४ विकेट लिन ५ ओभरमा १९ रन खर्चिए।
खेलमा प्रदेश नम्बर-४ ले पहिले ब्याटिंग गर्दै ५० ओभरमा ७ विकेट गुमाएर ३१० रनको योगफल तयार गरेको थियो। ३११ रनको लक्ष्य पछ्याएको प्रदेश नम्बर-१ ले ३५ ओभरमा सबै विकेट गुमाएर १८१ रन मात्रै बनाउन सक्यो। स्कोरकार्ड हेर्नुस
