आईसीसी टि-ट्वान्टी विश्वकप अन्तर्गत दक्षिण अफ्रीका बिरुद्ध श्रीलंकन स्पिनर वानिन्दु हसरंगाले ह्याट्रिक लिंदै दुईवटा कीर्तिमान बनाएका छन्।
जारि विश्वकपमा ह्याट्रिक लिने हसरंगा दोश्रो बलर हुन्। यस अघि समुह चरणमा आयरल्याण्डका दायाँ हाते पेसर कर्टिस क्याम्फरले नेदरल्याण्ड बिरुद्ध ह्याट्रिक सहित लगातार ४ बलमा ४ विकेट लिएका थिए।
लेग स्पिनर हसरंगा टि-ट्वान्टी विश्वकपमा ह्याट्रिक विकेट लिने पहिलो श्रीलंकन बलर बनेका छन् भने एकदिवसीय अन्तर्राष्ट्रिय र टि-ट्वान्टी अन्तर्राष्ट्रिय दुवै फर्म्याटमा ह्याट्रिक विकेट लिने विश्वको मात्र चौंथो बलर बनेका छन्। यस अघि ब्रेट लि, थिसारा परेरा र लासिथ मालिंगाले दुवै फर्म्याटमा ह्याट्रिक लिएका थिए। यस्तै टि-ट्वान्टी विश्वकपमा ह्याट्रिक लिने हसरंगा मात्र तेश्रो बलर हुन्। आयरल्याण्डका कर्टिस क्याम्फरले जारि विश्वकपमा तथा ब्रेट लिले सन् २००७ मा ह्याट्रिक लिएका थिए।
हसरंगाले एकै ओभरमा भने ह्याट्रिक पुरा गरेका हैनन्। १६ औं ओभरको अन्तिम बलमा १९ रन बनाएका एडेन मारक्रमलाई बोल्ड गरेका उनले १८ औं ओभरमा स्पेलको अन्तिम ओभर बलिंग गर्ने क्रममा पहिलो बलमा ४६ रन बनाएका तेम्बा बभुमालाई क्याच आउट गर्दै तथा दोश्रो बलमा पहिलो बल सामना गरेका ड्वेन प्रिटोरियसलाई क्याच आउट पार्दै ह्याट्रिक पुरा गरे।
टि-ट्वान्टी अन्तर्राष्ट्रिय क्रिकेट इतिहासमा ह्याट्रिक विकेट लिने हसरंगा विश्वका २३ औं बलर हुन्। वर्ष २०२१ मा हालसम्म ११ जना बलरले ह्याट्रिक विकेट लिएका छन् जुन अहिलेसम्मकै सर्वाधिक हो।
हसरंगाले खेलमा ह्याट्रिक सहित ४ ओभरमा २० रन खर्चेर ३ विकेट लिएता पनि खेलमा श्रीलंका दक्षिण अफ्रीकासंग ४ विकेटले पराजित हुन पुग्यो। श्रीलंकाले दिएको १४३ रनको लक्ष्य दक्षिण अफ्रीकाले १९.५ ओभरमा ६ विकेट गुमाएर भेटायो।
