बागमती प्रदेश आमन्त्रण महिला क्रिकेट सिरिज अन्तर्गत टी–२० फर्म्याटको पहिलो खेलमा पाहुना टोली हङकङ क्रिकेट क्लब विजयी भएको छ ।
मुलपानी क्रिकेट मैदानमा मङ्गलबार भएको खेलमा हङकङले आयोजक बागमती प्रदेशलाई ५७ रनले हरायो ।
टस हारेपछि पहिले ब्याटिङ गरेको हङकङले निर्धारित २० ओभरमा ६ विकेटको क्षतिमा एक सय ६८ रन बनाएको थियो । उसको लागि लेमों चुंगले ४० तथा बेट्टी चानले ३३ रन बनाए। बागमतीको बलिंगमा सोनी पाख्रिन र क्रिश्मा गुरुङले २/२ विकेट लिए।
जवाफमा बागमती प्रदेश निर्धारित २० ओभरमा आठ विकेटको क्षतिमा एक सय ११ रनमा समेटियो। बिन्दा कटवाल र खुसि डंगोलले समान १८ रन, हेलिशा गुरुङले १७ रन बनाए।
यस जितसँगै पाहुना टोली हङकङले दुई खेलको सिरिजमा १–० को अग्रता लिएको छ । दोस्रो खेल बिहीबार हुनेछ । यसअघि दुई टोली बीचको ४० ओभरमा दुई खेलको सिरिज नेपालले २–० ले जितिसकेको छ ।
