नेपाल क्रिकेट सङ्घ (क्यान) ले हङकङमा हुने चार देश सम्मिलित महिला टी-२० शृङ्खलाका लागि आज (मङ्गलवार) २२ जना खेलाडीलाई बन्द प्रशिक्षणमा बोलाएको छ ।
यही कात्तिक २९ देखि मङ्सिर ३ गतेसम्म हङकङमा आयोजना हुने प्रतियोगितामा आयोजक हङकङसहित नेपाल, युएई र मलेसिया छन् ।
छनोट हुने नेपाली टोलीमा रुबिना क्षेत्री, पूजा महतो, सीता रानामगर, इन्दु बर्मा, विन्दु रावल, सङ्गीता राई, ज्योति पाण्डे र रोमा थापा छन् । त्यसैगरी ईश्वरी विष्ट, सम्झना खड्का, रुवि पोदार, सबनम राई, कविता जोशी, अश्मिना कर्माचार्य, खुसी डङ्गोल, कृतिका मरासिनी, कञ्चन श्रेष्ठ, सोनी पाख्रिन, सोमु विष्ट, अप्सरी बेगम, काजोल श्रेष्ठ र मनीषा चौधरी छन् ।
रुविना र सीताले अलस्टार्स टी-२० खेल्ने
यसबिच नेपालका दुई अनुभवी महिला क्रिकेट रुविना र सीताले विदेशी खेलाडीको हैसियतमा हङकङको घरेलु प्रतियोगिता वुमेन्स अल स्टार्स टी-२० प्रतियोगितामा खेल्ने हुनुभएको छ । यी दुवैले चारदेशीय टी-२० क्रिकेट शृङ्खलाअघि अल स्टार्स टी-२० खेल्नुहुनेछ । सो प्रतियोगिता कात्तिक २४ गतेदेखि सुरु हुँदैछ ।
