( फिचर फोटो – हरिशंकर शाह )
प्रधानमन्त्री कप एकदिवसीय क्रिकेट प्रतियोगिता अन्तर्गत कर्णाली प्रदेशलाई प्रदेश-२ ले ठुलो अन्तरले पराजित गरेको छ।
प्रधानमन्त्री कपमा दोश्रो संस्करण खेलीरहेको कर्णालीले हालसम्म जित दर्ता गर्न सकेको छैन। दोश्रो पटक प्रधानमन्त्री कपमा प्रदेशको टिम खेल्दा कर्णालीले प्रतिस्पर्धात्मक प्रदर्शन गर्न सकेको छैन जसकारण जितको लागि अझै प्रतिक्षा अझ लम्बिने भएको छ।
पहिलो खेलमा पुलिससंग ९४ रनले तथा दोश्रो खेलमा आर्मीसंग ११७ रनले पराजित भएको कर्णालीले अब समुह चरण अन्तर्गत अन्तिम खेलमा प्रदेश-१ संग १७ गते खेल्नेछ।
उता प्रदेश-२ ले भने २ खेल खेल्दा पहिलो जित हात पारेको छ। यस अघि प्रदेश-२ ले त्रिभुवन आर्मी क्लबसंग १७१ रनको हार बेहोरेको थियो। समुह ‘बि’ अन्तर्गत आर्मीले ३ खेलमा ३ वटै जित दर्ता गर्दै सेमीफाइनल लगभग पक्का गरिसकेको छ। पुलिसले १ खेलमा जित दर्ता गरेको छ भने प्रदेश-२ ले खेलेको १ खेलमा हार बेहोरेको छ। समुह बाट ५ मध्ये २ उत्कृस्ट टिम सेमीफाइनल प्रवेश गर्नेछ।
टियु मैदानमा सम्पन्न खेलमा टस जितेर ब्याटिंग रोजेको कर्णालीले ३०.४ ओभरमा ९३ रनमा सबै विकेट गुमाएको थियो। ९४ रनको लक्ष्य प्रदेश-२ ले १६ ओभरमा १ विकेट गुमाएर पुरा गर्यो।
प्रदेश-२ को जितमा ओपनिंग ब्याट्सम्यान हरिशंकर शाहले अविजित ५५ ( ६४ बलमा ७ चौका ) तथा रभी शाहले अविजित १६ रन बनाए। हसिम अन्सारी १७ रन बनाएर आउट भए।
यस अघि कर्णालीलाई सस्तोमा समेट्न प्रदेश-२ का लेग स्पिन बलर कुमार थापाले ३ विकेट ( ८-०-३५-३ ) , राशिद खानले २, सम्शाद शेखले २ तथा हरिशंकर शाहले २ विकेट लिए। कर्णालीको लागि प्रकाश जैसीले सर्वाधिक ३७ रन बनाए।
खेलको प्लेयर अफ द म्याच हरिशंकर शाह चुनिए।
