काठमाडौं । अन्तर्राष्ट्रिय क्रिकेट परिषद (आइसिसी)ले यस वर्षको अन्त्यमा हुने महिला टि ट्वान्टी विश्वकपलाई बंगलादेशबाहिर सार्न परेमा युएई, भारत र श्रीलंकालाई वैकल्पिक आयोजना स्थलको सूचीमा परेका छन् ।
बंगलादेशमा पछिल्ला केही हप्तादेखि सरकार विरोधी आन्दोलन भइरहेका छन् । जसका कारण कैयौँको मृत्यु भएको छ । सोमबार प्रधानमन्त्री शेख हसिनाले राजीनामा दिएर भारत प्रस्थान गरेकी थिइन् । भने, सेना प्रमुख जनरल वाकर–उज–जमानले अन्तरिम सरकार गठनका लागि कार्यभार सम्हालेका छन् । बंगलादेशका पूर्वकप्तान मशरफे मुर्तजाको ढाकाबाट करिब १सय ५० किलोमिटर टाढा नराइलमा रहेको निवास पनि प्रदर्शनकारीले नष्ट गरेका छन् । जो हाल सांसद समेत रहेका छन् ।
आगामी अक्टोबर ३ देखि २० तारिखसम्म आयोजना हुने तय भएको विश्वकपको आइसिसीले अनौपचारिक रुपमा वैकल्पिक आयोजना स्थानको टुङ्गो लगाएको हो ।
आइसिसीका अनुसार बंगलादेशको अवस्थाको अनुगमन भइरहेको र सबै विकल्प खुला राखिएको छ । आईसीसीले सोमबार जारी गरेको विज्ञप्तिमा भनिएको छ, ुआईसीसीले बंगलादेश क्रिकेट बोर्ड (बीसीबी), तिनका सुरक्षा निकाय र हाम्रा आफ्नै स्वतन्त्र सुरक्षा परामर्शदातासँग समन्वय गरेर घटनाक्रमलाई नजिकबाट नियालिरहेको छ । ूहाम्रो प्राथमिकता सबै सहभागीहरूको सुरक्षा र कल्याण हो।
सोमबारको घटनाक्रमपछि अस्ट्रेलिया, इंग्ल्यान्ड र भारतगरी कम्तीमा तीन देशका सरकारले आफ्ना नागरिकलाई बंगलादेश भ्रमण नगर्न ट्राभल एडभाइजरी जारी गरेका छन् ।
भारत र श्रीलंका छोटो समयमा प्रतियोगिता आयोजना गर्न सक्षम भए पनि केही प्रश्न भने रहेका छन् । श्रीलंकामा अक्टोबरमा वर्षाको खतरा छ । भने, भारतसँग पाकिस्तानी टोलीका लागि भिसाको विषय बाधक बन्न सक्छ ।
बंगलादेशको सिनियर टोली अगस्ट १७ मा पाकिस्तान प्रस्थान गर्नेछ । पीसीबीले बीसीबीलाई बंगलादेशको टेस्ट टोलीलाई पहिले नै पाकिस्तान पठाउन सुझाव दिएको छ ताकि उनीहरूले अगस्ट २१ देखि सुरु हुने टेस्ट शृङ्खलाअघि रावलपिण्डीमा प्रशिक्षण र अभ्यास गर्न सकून् । बीसीबीले अहिलेसम्म पीसीबीलाई कुनै प्रतिक्रिया दिएको छैन ।
पछिल्लो पटक आइसिसीले सन् २०२१ मा कोभिड–१९ महामारीका कारण पुरुष टि ट्वान्टी विश्वकप भारतबाहिर युएई र ओमानमा सारेको थियो ।
