युएईमा जारि एसिया कप टि-२० प्रतियोगिता अन्तर्गत दोश्रो खेलमा भारतले चिर प्रतिद्वन्द्वी पाकिस्तानलाई ५ विकेटले पराजित गर्दै विजयी सुरुवात गरेको छ। दुबई अन्तर्राष्ट्रिय स्टेडियममा पाकिस्तानले दिएको १४८ रनको लक्ष्य भारतले २ बल बाँकी रहंदा भेटायो।
भारतको लागि रभिन्द्र जडेजा र बिराट कोहलीले समान ३५ रन तथा हार्दिक पान्ड्याले अविजित ३३ रन योगदान दिए। सूर्यकुमार यादवले १८ तथा रोहित शर्माले १२ रन बनाए। जडेजा र पान्ड्याले पाँचौ विकेटको लागि ५२ रनको महत्वपूर्ण साझेदारी गरे। जितको लागि अन्तिम ३ बलमा ६ रन आवस्यक हुँदा पान्ड्याले छक्का प्रहार गर्दै भारतलाई जित दिलाए।
पाकिस्तानको बलिंगमा मोहम्मद नवाजले ३ तथा नसिम शाहले २ विकेट लिए।
टस हारेर ब्याटिंग गरेको पाकिस्तानले १९.५ ओभरमा सबै विकेट गुमाएर १४७ रन बनायो।
पाकिस्तानको लागि ओपनर मोहम्मद रिजवानले सर्वाधिक ४३ रन योगदान दिए जुन क्रममा ४२ बलमा ४ चौका र १ छक्का प्रहार गरे। इफ्तिखार एहमदले २८, शाहनावज दहानीले १६ तथा हरिस रौफले अविजित १३ रन बनाए।
भारतको बलिंगमा दायाँ हाते पेसर भुवनेश्वर कुमारले ४ विकेट लिए जुन क्रममा ४ ओभरमा २६ रन खर्चिए। अर्का पेसर हार्दिक पान्ड्याले ३ विकेट लिए। अर्शदिप सिंहले २ विकेट तथा आभेस खानले १ विकेट लिए।
प्रतियोगिताको पहिलो खेलमा अफगानिस्तानले श्रीलंकालाई पराजित गरेको थियो।
प्रतियोगितामा भारत, पाकिस्तान, श्रीलंका, बंगलादेश, अफगानिस्तान र हंगकंग गरि ६ टिम सहभागी छन्। समुह ‘ए’ मा भारत, पाकिस्तान र हंगकंग छन् भने समुह ‘बि’ मा श्रीलंका, बंगलादेश र अफगानिस्तान छन्। सबै टिमले समुह चरणमा एक अर्का बिरुद्ध १/१ खेल खेलेपछि दुवै समुहको उत्कृस्ट २/२ टिम सुपर-४ चरण प्रवेश गर्नेछन्।