केएल राहुलले शतक प्रहार गर्दा इंग्ल्यान्ड भ्रमण अन्तर्गत पाँच टेस्टको सिरिज अन्तर्गत बिहिबार सुरु भएको दोश्रो टेस्टको पहिलो दिन समाप्तिमा भारतले उत्कृस्ट सुरुवात गरेको छ।
लर्ड्स मैदानमा टस हारेर ब्याटिंग गरेको भारतले दिनको समाप्तिमा ९० ओभरमा ३ विकेट क्षेतीमा २७६ रन बनाएको छ। क्रिजमा केएल राहुल १२७ रनमा तथा अजिंके रहाने १ रनमा अविजित रहेका छन्। करियरको छैठौं शतक बनाएका राहुलले २४८ बलमा १२ चौका र १ छक्का प्रहार गरेका छन्।
भारतीय ओपनर रोहित शर्मा र केएल राहुलले १२६ रनको ओपनिंग साझेदारी गर्दै राम्रो सुरुवात दिलाए। भारतीय ओपनरले भारतबाहिर शतकीय साझेदारी गरेको २०१० डिसेम्बर पछि पहिलो पटक हो। पछिल्लो पटक दक्षिण अफ्रीका बिरुद्ध सेंचुरियनमा विरेन्द्र सेहवाग र गौतम गम्भीरले १३७ रनको साझेदारी गरेका थिए।
४४ औं ओभरमा जेम्स एण्डरसनबाट बोल्ड हुनु अघि रोहितले १४५ बलमा ११ चौका र १ छक्का मद्दतले ८३ रन बनाए। चेतेश्वर पुजारा लामो समय क्रिजमा जम्न सकेनन् र ९ रन बनाएर क्याच आउट भए। उनलाई एण्डरसनको दोश्रो शिकार बनाए। तेश्रो विकेटको लागि राहुलले कप्तान बिराट कोहलीसंग शतकीय साझेदारी गरे। ११७ रनको साझेदारी गरेपछि कोहली ८५ औं ओभरमा ओली रोबिन्सनबाट स्लिपमा जो रुटबाट क्याच आउट हुन पुगे। कोहलीले १०३ बलमा ४२ रन बनाए। कोहलीको विकेट पछि रहाने र राहुलले अविजित ९ रनको साझेदारी गरेका छन्।
इंग्ल्यान्डको बलिंगमा जेम्स एण्डरसनले २ विकेट ( २०-४-५२-२ ) र ओली रोबिन्सन ( २३-७-४७-१ ) ले १ विकेट लिएका छन्।
खेलमा भारतले अन्तिम-११ मा घाइते शार्दुल ठाकुरको स्थानमा इशान्त शर्मालाई मौका दिएको छ। अर्कोतर्फ इंग्ल्यान्डले टिममा अघिल्लो खेलभन्दा तिन खेलाडी परिवर्तन गरेको छ। घाइते भएर सिरिजबाट बाहिर भएका स्टुवार्ट ब्रोडको स्थानमा अर्का पेसर मार्क वुडलाई, ड्यानीयल लरेन्सलाई बाहिर राख्दै मोईन अलिलाई तथा ज्याक क्रलेको स्थानमा हसिब हमिदलाई अन्तिम-११ मा इंग्ल्यान्डले मौका दिएको छ।
