वेस्ट इन्डिज टुर अन्तर्गत पहिलो टि-२० मा भारतले घरेलु टिमलाई ४ विकेटले पराजित गरेको छ। जितसंगै ३ वटा टि-२० को सिरिज अन्तर्गत भारतले १-० को अग्रता लिएको छ। दोश्रो टि-२० आइतबार खेलिनेछ।
खेलमा पहिले ब्याटिंग गर्दै वेस्टइन्डिजले दिएको ९६ रनको लक्ष्य भारतले १७.२ ओभरमा ६ विकेट गुमाएर पुरा गर्यो।
९६ रनको लक्ष्य पछ्याउने क्रममा भारतको सुरुवात पनि राम्रो हुन सकेन। ओपनर रोहित शर्मा २४, शिखर धवन १ तथा रिशाभ पन्त खाता नखोली आउट हुँदा भारत ३२/३ को अवस्थामा पुग्यो।
त्यसपछि कप्तान बिराट कोहली र मनिष पाण्डेले चौथो विकेटको लागि ३२ रनको साझेदारी गरे। पाण्डे र कोहली दुवै समान १९ रन बनाएर आउट हुँदा १४ औं ओभरमा भारत ६९/५ को अवस्थामा पुगेको थियो। सुनिल नारायणले रोहित र रिशभको तथा शेल्डन कटरेलले धवन र कोहलीको विकेट लिए।
त्यसपछि कृनाल पान्ड्याले १२, रभिन्द्र जडेजाले अविजित १० तथा वासिंगटन सुन्दरले अविजित ८ रन बनाउदै भारतलाई जितसम्म पुर्याए।
वेस्टइन्डिजको बलिंगमा केमो पौल ( ३.२-०-२३-२ ) , सुनिल नारायण ( ४-०-१४-२ ) र शेल्डन कटरेल ( ४-०-२०-२ ) ले २/२ विकेट लिए।
वेस्टइन्डिजको ब्याटिंग
यस अघि टस हारेर ब्याटिंग गरेको वेस्टइन्डिजले २० ओभरमा ९ विकेट गुमाएर ९५ रन बनाएको थियो। उसको लागि काइरन पोलार्डले सर्वाधिक ४९ रन बनाए जुन क्रममा ४९ बलमा ४ चौका र २ छक्का प्रहार गरे। निकोलस पुरनले २० रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन्।
एक समय ३३ रनमा ५ विकेट गुमाएको वेस्ट इन्डिजलाई पोलार्डले अन्तिमसम्म ब्याटिंग गर्दै सम्मानजनक स्थितिमा पुर्याएका थिए।
भारतको बलिंगमा टि-२० अन्तर्राष्ट्रियमा डेब्यु गरेका नभदिप सैनीले सर्वाधिक ३ विकेट ( ४-१-१७-३ ) लिए। यस्तै भुवनेश्वर कुमारले २ ( ४-०-१९-२ ) तथा वासिंगटन सुन्दर, खलिल एहमद, क्रुनाल पान्ड्या र रभिन्द्र जडेजाले १/१ विकेट लिए।
