काठमाडौं । श्रीलंकामा जारी एसीसी महिला एसिया कपमा भारतले नेपाललाई १ सय ७९ रनको विशाल लक्ष्य दिएको छ ।
डम्बुलामा टस जितेर पहिले ब्याटिङ गरेको भारतले निर्धारित २० ओभरमा ३ विकेट गुमाएर १ सय ७८ रन बनायो ।
भारतका लागि ओपनर शेफाली बर्माले ४८ बलमा १२ चौका र १ छक्काको सहयोगमा ८१ रनको अर्धशतकीय ईनिङ खेलिन् । अर्की ओपनर दयालन हेमलथाले ४२ बलमा ४७ रनको योगदान गरिन् ।
पहिलो विकेटका लागि बर्मा र हेमलथाले पहिलो विकेटका लागि १ सय २२ रनको शतकीय साझेदारी गरे ।
चौधौ ओभरको अन्तिम बलमा नेपालकी सिता राना मगरले ओपनिङ साझेदारी तोडेकी थिईन् । जेमिमा रोड्रिगेजले १५ बलमा २८ रन बनाईन् ।
नेपालको लागि सिता राना मगरले दुई तथा कविता जोशीले एक विकेट लिईन् । यस समूहमा भारत अपराजित रुपमा शीर्ष स्थानमा रहेको छ । नेपाल एक खेलमा जितका साथ तेस्रो स्थानमा छ ।
