काठमाडौं । नवौं संस्करणको टी-२० विश्वकपको फाइनलमा दक्षिण अफ्रिकालाई पराजित गर्दै भारत च्याम्पियन भएको छ ।
वेस्ट इन्डिजको बारबाडोसमा भएको फाइनल खेलमा भारत ७ रनले विजयी भयो ।
भारतले दिएको १ सय ७७ रनको लक्ष्य पछ्याएको दक्षिण अफ्रिकाले निर्धारित २० ओभरमा ८ विकेट गुमाएर १ सय ६९ रन मात्र बनाउँन सक्यो ।
दक्षिण अफ्रिकाका लागि हेनरिक क्लासेनले २७ बलमा २ चौका र ५ छक्काको सहयोगमा ५२ रनको अर्धशतकीय ईनिङ खेले पनि टोलीलाई जित दिलाउँन भने सकेनन् । क्विटन डि ककले ३१ बलमा ४ चौका र १ छक्काको सहयोगमा ३९ रन बनाए ।
ट्रिस्टन स्टब्सले २१ बलमा ३१ तथा डेबिड मिलरले १७ बलमा २१ रन बनाए । स्टब्स र डि ककले तेस्रो विकेटका लागि ३८ बलमा ५८ रनको साझेदारी गरे ।
मिलर र क्लासेनले पाँचौ विकेटका लागि २२ बलमा ४५ रनको साझेदारी गरे ।
भारतका लागि हार्दिक पान्ड्याले तीन तथा जसप्रित बुमराह र अर्शदिप सिंहले समान दुई दुई विकेट लिए ।
त्यसअघि टस जितेर पहिले ब्याटिङ गरेको भारतले निर्धारित २० ओभरमा ७ विकेट गुमाएर १ सय ७६ रन बनाएको थियो ।
भारतका लागि विराट कोहलीले ५९ बलमा ६ चौका र २ छक्काको सहयोगमा ७६ रनको अर्धशतकीय ईनिङ खेले । अक्षर पटेलले ३१ बलमा १ चौका र ४ छक्काको सहयोगमा ४७ रन बनाए ।
पहिलो ओभरमा १५ रन जोडेर राम्रो सुरुआत गरेको भारतले दोस्रो ओभरमा दुई विकेट गुमाएको थियो । विकेट गुमाएसँगै दबाबमा आएको भारतले पाँचौ ओभरको तेस्रो बलमा ३४ रन बनाउँदा तेस्रो विकेट गुमायो ।
चौथो विकेटका लागि कोहली र पटेलले ५४ बलमा ७५ रनको महत्वपूर्ण साझेदारी गर्दै टोलीलाई बलियो योगफलसम्म पुर्याउन सफल भए ।
कागिसो रबडाको बलमा ४७ रन आउट भए । पटेल आउट भएसँगै क्रिजमा आएका शिभम दुबेले १६ बलमा ३ चौका र १ छक्काको सहयोगमा २७ रन बनाए ।
पाँचौ विकेटका लागि दुबे र कोहलीले ३३ बलमा ५७ रनको महत्वपुर्ण साझेदारी गरे । कोहली आउट भएसँगै यो साझेदारी तोडिएको थियो । कोहली आउट भएसँगै क्रिजमा आएका हार्दिक पान्ड्याले २ बलमा अविजित ५ रन बनाए ।
दक्षिण अफ्रिकाका लागि केशब महाराज र एनरिक नोर्कियाले समान दुई दुई तथा मार्को यानसन र कागिसो रबडाले समान एक एक विकेट लिए ।
२००७ मा भएको पहिलो संस्करणको उपाधी विजेता भारत २०१३ पछि पहिलो पटक आइसीसीको कुनै पनि प्रतियोगिता जित्न सफल भएको हो ।
पहिलो पटक फाइनलमा स्थान बनाएको दक्षिण अफ्रिका भारतलाई पराजित गर्दै च्याम्पियन बन्ने सपना अधुरो नै रह्यो ।
