काठमाडौं । इन्डोर क्रिकेट प्रतियोगितामा नेपालकै सर्वाधिक पुरस्कार राशी भएको भक्तबीर सिंह इन्डोर टि-१० क्रिकेट च्याम्पियनसिप साउनको अन्तिम साता आयोजना हुने भएको छ ।
कटियाला हाउस प्रालिको आयोजनमा हुने च्याम्पियनसिपको पहिलो संस्करण आगामी साउन २२ देखि साउन २६ सम्म हुने राजधानीमा एक कार्यक्रमका बीच जानकारी गराइएको छ । प्रतियोगितामा कुनै पनि क्लब तथा समूहले भाग लिन सक्ने आयोजकले जनाएको छ ।
वर्षायाममा पनि क्रिकेट प्रतियोगिता आयोजना गरेर समग्र क्रिकेटप्रमीहरुलाई जोड्ने प्रमुख उद्देश्यले प्रतियोगिता आयोजना भएको प्रतियोगिताको निर्देशक ज्योती भन्डारीले बताउनु भयो ।
वर्षायामको समयमा आउटडोर क्रिकेट नभएर खेलाडीहरुको खाली समयलाई यस्ता इन्डोर प्रतियोगिताले क्रिकेटमा व्यस्त राख्ने कार्यक्रमका प्रमुख अतिथि तथा राष्ट्रिय क्रिकेट टोलीका पुर्व सदस्य सुवास खकुरेलले बताउनु भयो ।
सर्वाधिक पुरस्कार राशीको यस प्रतियोगिताले खेलाडीलाई आर्थिक रुपमा समेत सहयोग गर्ने खकुरेलले बताए । कार्यक्रममा प्रतियोगिताका कोअर्डिनेटर दीपेन्द्र भुषाल तथा टेक्निकल डिरेक्टर रविन्द्र गुप्ताको समेत उपस्थिती रहेको थियो ।
भेलोसिटी इन्डोर क्रिकेट मैदानमा हुने प्रतियोगिताको विजेताले एक लाख असी हजार र उपविजेताले असी हजार नगद, ट्रफि र मेडल पाउने आयोजकले सो कार्यक्रममा बताए । आयोजकका अनुसार प्रतियोगिताका सर्वोत्कृष्ट खेलाडीलाई दश हजार, उत्कृष्ट ब्याटर र बलरलाई जनही पाँच हजार तथा प्रत्येक खेलका प्लेयर अफ द म्याचलाई एक हजार नगदले पुरस्कृत गरिनेछ ।
