गुजरात टाइटन्स आइपिएलको फाइनलमा प्रवेश गरेको छ । पहिलो क्वालिफायर खेलमा गुजरात टाइटन्सले राजस्थान रोयल्सलाई ७ विकेटले हराएको हो ।
जितका लागि १८९ रनको लक्ष्य पछ्याएको गुजरात टाइटन्सले तीन बल बाँकी रहँदै तीन विकेटमा १९१ रन बनाएर जित निकाल्यो ।
डेभिड मिलर गुजरातको जितको नायक साबित भए । मिलरले ३८ बलमा तीन चौका र पाँच छक्का प्रहार गर्दै अविजित ६८ रन बनाए । उनले जित्न १६ रन आवस्यक हुँदा अन्तिम ओभरको पहिलो तीन बलमा लगातार छक्का प्रहार गर्दै टोलीलाई फाइनलमा पुर्याए । उनलाई कप्तान हार्दिक पाण्डेयले राम्रो साथ दिए । पाण्ड्याले २७ बलमा ५ चौका प्रहार गर्दै अविजित ४० रन बनाए । मिलर र पान्ड्या बीच चौंथो विकेटको लागि १०६ रनको साझेदारी भयो। यसअघि शुभमन गिल र म्याथ्यु वेडले ३५-३५ रनको योगदान दिएका थिए ।
यसअघि पहिले ब्याटिङ गरेको राजस्थान रोयल्सले २० ओभरमा ६ विकेट गुमाएर १८८ रन बनाएको थियो । राजस्थान रोयल्सका लागि जोस बटलरले सर्वाधिक ८९ रन बनाए । बटलरले ५६ बलमा १२ चौका र दुई छक्का प्रहार गर्दै ८९ रन बनाए । गुजरात बलर मोहम्मद सामी, यश दयाल, साई किशोर र हार्दिक पान्ड्याले १/१ विकेट लिए।
गुजरात टाइटन्सको टोली पहिलो पटक आइपिएलमा सहभागी भएको हो । तर, यो हारपछि राजस्थान रोयल्ससँग अझै एक मौका छ । उसले एलिमिनेटर राउन्डमा विजेता टोलीसँग दोस्रो क्वालिफायर खेल्ने मौका पाउनेछ। सन् २००८ को आइपिएलको पहिलो सिजनमा राजस्थान रोयल्सले उपाधि जितेको थियो ।
लिगको इलिमीनेटरमा आज लखनउ सुपर जायन्ट्स र रोयल च्यालेन्जर्स बैंगलोर बीच प्रतिस्पर्धा हुँदाछ। खेल नेपाली समय राति ७:४५ बजे सुरु हुनेछ।