युएईमा जारी १३ औं संस्करणको आईपिएल अन्तर्गत शुक्रबार ३२ औं खेलमा रोहित शर्माको कप्तानीमा मुम्बई इन्डियन्स र ओएन मोर्गनको कप्तानीमा रहेको कोलकाता नाइट राइडर्स प्रतिस्पर्धा गरिरहेका छन्।
शेख जायद स्टेडियम अबुधाबीमा टस जितेर ब्याटिंग रोजेको कोलकाताले निर्धारित २० ओभरमा ५ विकेट गुमाएर १४८ रन बनाउदै मुम्बईलाई १४९ रनको लक्ष्य प्रस्तुत गरेको छ।
कोलकाताको लागि प्याट कमिन्सले सर्वाधिक ५३ रन बनाए जुन क्रममा ३६ बलमा ५ चौका र २ छक्का प्रहार गरे। आईपीएलमा कमिन्सको यो पहिलो अर्धशतक हो। यस्तै नवनियुक्त कप्तान ओएन मोर्गनले २९ बलमा ३९ रन बनाए जुन क्रममा २ चौका र २ छक्का प्रहार गरे।
कमजोर सुरुवात गरेको कोलकाताले पहिलो ५ विकेट ६१ रनको योगफलमा गुमाउन पुग्यो। शुबमन गिल २१ , राहुल त्रिपाठी ७, नितिश राना ५, दिनेश कार्तिक ४ तथा आन्द्रे रसेल १२ रन बनाएर आउट भए।
छैठौं विकेटको लागि कप्तान ओए मोर्गन र प्याट कमिन्सले उत्कृस्ट साझेदारी गरे जुन क्रममा ५६ बलमा ८७ रन बनाउदै टिमलाई प्रतिस्पर्धात्मक योगफलसम्म पुर्याए। यस क्रममा अन्तिम ५ ओभरमा दुवैले ५३ रन बनाए।
१८ औं ओभरमा कमिन्सको क्याच विकेटकिपर क्विन्टन डीककले छोडेपछि कमिन्सले त्यसको भरपुर फाइदा उठाए। १९ औं ओभरमा कमिन्सले बोल्टलाई १ चौका र १ छक्का प्रहार गरे। अन्तिम ओभरको पहिलो बलमा नाथन कौल्टर नाइललाई चौका प्रहार गर्दै उनले अर्धशतक पुरा गरेका थिए। अन्तिम ओभरमा ओएन मोर्गनले तेश्रो र अन्तिम बलमा छक्का हिर्काएका थिए।
मुम्बईको बलिंगमा लेग स्पिनर राहुल चाहरले सर्वाधिक २ विकेट ( ४-०-१८-२ ) लिए जुन क्रममा शुबमन गिल र दिनेश कार्तिकको विकेट लिए। जस्प्रित बुम्राह ( ४-०-२२-१ ) , ट्रेन्ट बोल्ट ( ४-०-३२-१ ) , नाथन कौल्टर नाइल ( ४-०-५१-१ ) ले समान १ विकेट लिए। क्रुनाल पान्ड्या ( ४-०-२३-० ) विकेटविहिन रहे।
७ खेलमा १० अंकसहित मुम्बई अंकतालिकाको दोस्रो स्थानमा छ भने समान खेल खेलेको कोलकाता ४ जित र ३ हारपछि ८ अंक बटुल्दै अंकतालिकाको चौथो स्थानमा छ। मुम्बईलाई आजको खेलमा जित हात पार्दै शिर्ष स्थानमा उक्लने मौका छ। कोलकाता आज विजयी भएको खण्डमा तेस्रो स्थानमा उक्लने छ भने प्ले-अफ खेल्ने सम्भावना मजबुत हुनेछ।
