इशान पाण्डेको विस्फोटक शतकले टियु सजिलै सेमीफाइनलमा : युनिभर्सिटी कप

• विकेटनेपाल, फाल्गुन २९ – मंगलबार 

काठमाडौँमा जारि ‘गोल्डेन गेट युनिभर्सिटी कप क्रिकेट’ प्रतियोगिताको मंगलबार सम्पन्न क्वार्टरफाइनल खेलहरु जित्दै कस्मस कलेज र टियु सेमीफाइनल प्रवेश गरेका छन्। टियुले क्यारेबियन कलेजलाई तथा कस्मसले न्यु समित कलेजलाई पराजित गरेको हो।

पहिलो खेल – कस्मसको सहज जित 

यु-१९ रास्ट्रिय क्रिकेट टिममा रहीसकेका खेलाडीहरुको वर्चस्व रहेको कस्मसले टस हारेर पहिले ब्याटिंग गर्दै २० ओभरमा १४९/९ को योगफल तयार गर्यो। कमल सिंह ऐरीले सर्वाधिक ५६ रन ( ३९ बल, ४ चौका र ४ छक्का ) प्रहार गरे भने योगेन्द्र सिंह कार्कीले २५ र सन्दिप जोराले २४ रन बनाए। न्यु समिटका बलर जन्मेन्जय यादबले ४ विकेट हात हात पर्न ४ ओभरमा २५ रन खर्चिए।

जवाफमा ब्याटिंग गरेको न्यु समिटले खराब ब्याटिंग गर्यो र २० ओभरमा १०२ रन मात्रै बनाउन सक्यो। करन शाहले ३१ रन तथा शरद खड्काले २५ रन बनाए पनि अन्य ब्याट्सम्यानले उल्लेख्य रन बनाउन सकेनन्। कस्मसको लागि कुशल भुर्तेलले उत्कृस्ट बलिंग गर्दै ३ विकेट लिन ३ ओभर बलिंग गरेर २ मेडन ओभर सहित मात्र ४ रन खर्चिए।

दोश्रो खेल : इशान पाण्डेको विस्फोटक शतकमा टियुको ठुलो जित 

यु-१९ रास्ट्रिय क्रिकेटर रहीसकेका इशान पाण्डेले आक्रामक ब्याटिंग गर्दै १२६ रनको बिशाल इनिंग खेलेपछि टस जितेर ब्याटिंग गरेको टियुले २० ओभरमा ४ विकेट गुमाएर २०७ रनको योगफल तयार गर्यो। २०१६ को यु-१९ बिश्वकपमा नेपाली टिममा रहेका पाण्डेले मात्र ७० बल खेल्दै १६ चौका र ५ छक्का प्रहार गरे। कप्तान पृथु बास्कोटाले ३२ तथा सुबास खकुरेलले २४ रन बनाए।

बिशाल लक्ष्य पछ्याउने क्रममा क्यारेबियन कलेजले ७१ रनमै सम्पूर्ण विकेट गुमाउन पुग्यो।संजय अधिकारीले १६, अमित कुशवाहाले १४ र जय प्रकाश गुप्ताले १३ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन्। टियु बलर बिक्रम सोब,पृथु बास्कोटा र सागर ढकालले समान ३/३ विकेट लिए । पृथुले १.३ ओभर मात्र ११ रन खर्चे भने सोबले ४ ओभरमा १७ र ढकालले ४ ओभरमा मात्र ७ रन खर्चिए।

प्रतियोगिता अन्तर्गत बुधबार हुने क्वार्टरफाइनल खेलहरुमा शंकरदेब क्याम्पस र डीएभी तथा जनता कलेज र गोल्डेन गेट कलेजले प्रतिस्पर्धा गर्नेछन्।

कुल १६ वटा टिमको सहभागीता रहेको प्रतियोगिताको बिजेताले २ लाख रुपैयाँ तथा उपविजेताले १ लाख रुपैया प्राप्त गर्नेछन्। यस्तै उत्कृस्ट बलर र ब्याट्सम्यानले १० हजार रुपैया तथा प्रत्येक खेलको उत्कृस्ट खेलाडीले ५ हजार रुपैयाँ बराबरको एक्सटेपको जुत्ता र नेपाल टेलिकमद्वारा १ हजार रुपैया प्राप्त गरिरहेका छन्।

सहभागी टिमहरु –

गोल्डेनगेट कलेज, त्रिभुवन युनिभर्सिटी ‘ए’ , त्रिभुवन युनिभर्सिटी ‘बि’ , सेन्ट जेभियर कलेज, कसमस कलेज, नेपाल कमर्श क्याम्पस, डि.भी कलेज, ट्रिटन कलेज, शंकरदेव कलेज, क्यारेबियन कलेज, ओमेगा कलेज, युनिग्लोब कलेज, के एण्ड के कलेज, न्यु समिट कलेज, बन कलेज र जनता उच्च मावि