- विकेटनेपाल, बैशाख ११ – मंगलबार
इन्डियन प्रिमियर लिग (आइपिएल) क्रिकेट अन्तर्गत गएराती भएको खेलमा किंग्स ईलाभेन पन्जाबले दिल्ली डेयरडेभिल्सलाई ४ रनले पराजित गर्दै अंकतालिकाको शिर्ष स्थानमा उक्लिएको छ ।
प्रतियोगितामा खेलेका ६ खेलमध्ये ५ खेलमा जित र १ खेलमा हार व्यहोरेको पन्जाब १० अंक सहित शिर्ष स्थानमा उक्लेको छ भने समान ६ खेलबाट १ मात्र जित हात पार्दै मात्र २ अंकसहित दिल्ली अंकतालिकाको अन्तिममा रहेको छ ।
जारि सिजनमा पहिलोपल्ट घरेलु मैदानमा खेल खेलेको दिल्लीले टस जितेर पहिले ब्याटिंगको निम्तो दिएपछि पन्जाबले निर्धारित २० ओभरमा ८ विकेट गुमेर १४३ रनको योगफल तयार पारेको थियो । उसका लागि करुण नायरले ३४ रन (३२ बल, ४ चौका), डेविड मिलरले २६ रन (१९ बल, १ चौका, १ छक्का), लोकेश राहुलले २३ रन (१५ बल, ३ चौका, १ छक्का) र मयंक अग्रवालले २१ रन (१६ बल, ३ चौका) बनाएका थिए ।
बलिंगतर्फ दिल्लीका लागि पहिलो खेल खेलिरहेका लियाम प्लंकेटले ३ विकेट लिन ४ ओभरमा १७ रन खर्चिए भने ट्रेन्ट बोल्ट र आवेस खानले समान २/२ विकेट हात पारे ।
जवाफमा १४४ रनको बिजयी लक्ष्य सहित मैदानमा उत्रेको दिल्लीले श्रेयस ईयरको ५७ रनको बाबजुत निर्धारित २० ओभरमा ८ विकेट गुमाएर १३९ रनमात्र बनाउन सक्यो र पराजित भयो । इयरले ४५ बलमा ५ चौका र १ छक्का प्रहार गरेका थिए । त्यस्तै राहुल तेवातियाले २४ रन तथा आइपिएलमा डेब्यु गरेका पृथ्वी शहले २२ रन (१० बल) बनाएपनि जितको लागि पर्याप्त हुन सकेन ।
पन्जाबको लागि बलिंगतर्फ म्यान अफ द म्याच समेत घोषित अंकित राजपुतले २ विकेट लिन ४ ओभरमा २३ रन खर्चे भने एन्ड्रीउ टाई र मुजीब उर रहमानले पनि २/२ विकेट हात पारे ।
