लगातार ४ खेलमा पराजित भएपछि चेन्नाईले जारि आईपीएलमा रोयल च्यालेन्जर्स बैंगलोरलाई २३ रनले पराजित गर्दै पहिलो जित दर्ता गरेको छ। गय राति मुम्बई स्थित डीवाई पाटिल स्टेडियममा चेन्नाईले दिएको २१७ रनको लक्ष पछ्याएको बैंगलोरले १९३ रन बनायो।
चेन्नाईको जितमा ब्याटिंगतर्फ शिभम दुवेले सर्वाधिक ९५ रन बनाए जुन क्रममा ४६ बलमा ५ चौका र ८ छक्का प्रहार गरे। यस्तै रोबिन उथप्पाले ५० बलमा ४ चौका र ९ छक्का मद्दतले ८८ रन बनाए। बलिंगतर्फ महेश तिक्षनाले ४ तथा कप्तान रभीन्द्र जडेजाले ३ विकेट लिए।
जितपछि प्रतिक्रिया दिने क्रममा जडेजाले पहिलो जितलाई विशेष बताए –
“सर्वप्रथम, कप्तानको रूपमा यो पहिलो जित हो। म यसलाई मेरी श्रीमती र टोलीलाई समर्पण गर्न चाहन्छु, किनभने पहिलो जित सधैं विशेष हुन्छ।”
“अघिल्लो चार खेलमा, हामीले रेखा पार गर्न सकेनौं। तर टिमका रूपमा हामी राम्रो भयौं। ब्याटिङ युनिटको रूपमा, सबैले राम्रो काम गरे। रोबी र शिवमले उत्कृष्ट ब्याटिङ गरे । बलरले पनि बलमा योगदान दिए ।”
उनले टिम व्यवस्थापनले आफुलाई दबाब नदिएको बताए “हाम्रो टिम व्यवस्थापनले मलाई दबाब दिँदैन, उनीहरु मलाई उत्प्रेरित गर्ने गर्छन्। कप्तानको रूपमा, म अझै पनि वरिष्ठ खेलाडीहरूबाट सिकीरहेको छु। माही भाइ कहाँ गएर छलफल गर्छु । आफुलाई नयाँ भूमिकामा ढाल्दै, चीजहरू अघि बढाउन समय लाग्नेछ। म अझै पनि सिक्दै छु र हरेक खेलमा राम्रो गर्ने प्रयास गरिरहेको छु।”
“हामीसँग हाम्रो ड्रेसिङ रुममा धेरै अनुभव छ जुन अनुभव खेलमा आउँछ, हामी चाँडै आत्तिदैनौं। हामी आफूलाई शान्त राख्ने कोसिस गर्छौं र हामी सकारात्मक क्रिकेट खेल्न चाहन्छौं। हामी कडा मेहनत गर्नेछौँ , हामीले लय पाएका छौं, हामी अझ प्रयास गर्नेछौं र लय जारी राख्नेछौं।”
लिग अन्तर्गत चेन्नाईले आगामी खेल राम्रो लयमा रहेको गुजरात टाईटन्ससंग आइतबार ( अप्रिल १७ ) तारिखमा खेल्नेछ। अंकतालिकामा चेन्नाई ५ खेलमा १ जित र ४ हार पछि २ अंक सहित नवौं स्थानमा छ।
