भारतको इंग्ल्यान्ड भ्रमण अन्तर्गत पाँच टेस्टको सिरिज अन्तर्गत पहिलो टेस्ट जित्न २०९ रनको लक्ष्य पाएको भारतले राम्रो सुरुवात गरेको छ।
टेस्टको चौथो दिनको सम्पतिमा भारतले लक्ष्य पछ्याउने क्रममा ५२ रनमा १ विकेट गुमाएको छ। जितको लागि भारतलाई अझै १५७ रन आवस्यक रहेको छ। रोहित शर्मा र चेतेश्वर पुजारासंग १२ रन बनाएर क्रिजमा रहेका छन्। ३४ रनको ओपनिंग साझेदारी गरेपछि ओपनर केएल राहुल स्टुवार्ट ब्रोडबाट विकेटकिपरबाट क्याच आउट भए। राहुलले ३८ बलमा ६ चौका मद्दतले २६ रन बनाए।
यस अघि इंग्ल्यान्डले आफ्नो दोश्रो इनिंग्समा ३०३ रनमा सम्पूर्ण विकेट गुमाउदै भारतलाई २०९ रनको लक्ष्य प्रस्तुत गरेको थियो। इंग्ल्यान्डको लागि कप्तान जो रुटले २१ औं टेस्ट शतक बनाउने क्रममा १७२ बलमा १४ चौका मद्दतले १०९ रन बनाए। रुटलाई जस्प्रित बुम्राहले विकेटकिपर रिशभ पन्त बाट क्याच आउट गराए। यस्तै स्याम करनले ३२, जोनी बेयरस्टोले ३०, डोमिनिक सिबलेले २८ तथा ड्यानियल लरेन्सले २५ रन योगदान दिए। रुटले तेश्रो विकेटको लागि सिबलेसंग ८९ रनको महत्वपूर्ण साझेदारी गरेका थिए।
भारतको बलिंगमा जस्प्रित बुम्राहले सर्वाधिक ५ विकेट लिए जुन क्रममा १९ ओभरमा २ मेडन ओभर गर्दै ६४ रन खर्चिए। बुम्राहले टेस्टमा छैठौं पटक ५ विकेटको प्रदर्शन गरेका हुन्। मोहम्मद सिराज ( २५-३-८४-२ ) र शार्दुल ठाकुर ( १३-१-३७-२ ) ले समान २ विकेट तथा मोहम्मद शामीले १ विकेट ( १५.५.-१-७२-१ ) लिए।
टेस्टको पहिलो इनिंग्समा इंग्ल्यान्डले १८३ रन बनाएको थियो भने भारतले पहिलो इनिंग्समा २७८ रन बनाउदै ९५ रनको अग्रता हाँसिल गरेको थियो।
