नेपालमा जारी जय नेपाल टी-२० क्रिकेट प्रतियोगितामा आज शुक्रबार दुई खेलहरु सम्पन्न भएका छन् । जसमा बंगलादेशको ढाका विश्वविद्यालय र भारतको लखनउ विश्वविद्यालयले जित निकालेका छन् ।
पहिलो खेलमा ढाका विश्वविद्यालयले नेपालको पूर्वाञ्चल विश्वविद्यालयलाई १५२ रनले पराजित गरेको छ । ढाकाले दिएको २३६ रनको विशाल लक्ष्य पछ्याउने क्रममा पूर्वाञ्चल १९.३ ओभरमा ८३ रनमै समेटियो । पूर्वाञ्चलका धीरज यादव १७ रन बनाए । यस्तै, ओम चौधरीले १५ र रवीन्द्र साहले १० रन जोडे । ढाकाका बलर शारियर साकिबले ४ विकेट लिए भने इफ्तेखार हुसेनले २ विकेट लिए । मुजिबुर रहमान, महमुद्दिन तारिक, अशरफुल इस्लाम र महफुजुल इस्लामले १/१ विकेट लिए ।
यसअघि टस जितेर पहिले ब्याटिङ गरेको ढाका विश्वविद्यालयले २० ओभरमा ४ विकेट गुमाएर २३५ रन बनाएको थियो । मोहम्मद रहमानले ३७ बलमा ३ चौका र १० छक्का प्रहार गर्दै ९६ रनको विस्फोटक इनिङ्स खेले । सिपत खानले २३ बलमा ५० रन जोडे भने इफ्तेखार हुसेनले २३ बलमा ३८ रन र महफुजुल इस्लामले २५ बलमा ३१ रन बनाए । पूर्वाञ्चलका लागि निशित यादव, धीरज यादव, अमित मण्डल र अभिषेक मण्डलले १/१ विकेट लिए ।
दिनको दोस्रो खेलमा नेपालको काठमाडौं विश्वविद्यालय भारतको लखनउ विश्वविद्यालयसँग ७३ रनले पराजित भएको छ ।
नेपाल विद्यार्थी युनियनले आयोजना गरेको यस प्रतियोगितामा नेपालका ४, भारतका ३ र बंगलादेशको १ गरी ८ वटा विश्वविद्यालयहरुको सहभागिता रहेको छ ।
