कमल परियारले घातक बलिंग गर्दै ५ विकेट लिंदा एकदिवसीय अन्डर-१९ राष्ट्रिय प्रतियोगिता अन्तर्गत मुलपानीमा सम्पन्न खेलमा गण्डकी प्रदेशले प्रदेश-२ लाई ५५ रनले पराजित गर्दै प्रतियोगितामा दोस्रो जित निकालेको छ ।
प्रतियोगितामा प्रदेश-२ यसअघि ३ खेल खेल्दा २ जित र १ हार पछि ४ अंक सहित अंकतालिकाको तेश्रो स्थानमा छ। प्रदेश-२ ले पहिलो खेलमा सुदूरपश्चिम प्रदेशलाई २ विकेटले पराजित गरेको थियो। दोश्रो खेलमा प्रदेश-२ संग ७ विकेटले पराजित भएपछि तेश्रो खेलमा बागमती प्रदेशलाई ६ विकेटले पराजित गरेको थियो। गण्डकी प्रदेशले भने ३ खेलमा २ जित र १ हार बेहोरेको छ। पहिलो खेलमा लुम्बिनी प्रदेशसंग ९ विकेटले तथा दोश्रो खेलमा बागमती प्रदेशसंग ७५ रनले पराजित भएपछि तेश्रो खेलमा गण्डकीले कर्णाली प्रदेशलाई ३ विकेटले पराजित गरेको थियो।
१५७ रनको विजयी लक्ष्य पछ्याएको प्रदेश-२ ले २२.५ ओभरमा सम्पूर्ण विकेट गुमाएर मात्र १०१ रन बनाउँन सक्यो । प्रदेश-२ को ब्याटिंगमा त्रित राज दाशले ४१ बलमा समान २ चौका र २ छक्काको मद्धतमा सर्वाधिक ३१ रन बनाए । यस्तै, रोहन बिक र आदील अन्सारीले १९ रन बनाउँनु बाहेक अन्य ब्याट्सम्यानको उल्लेखनीय योगदान रहन सकेन ।
पहिलो ओभरमै सन्तोष कार्की आउट भएपछि रोहन बिक र त्रित राज दाशले दोस्रो विकेटका लागि ३६ रनको साझेदारी गरे । बिक आउट भएपछि प्रदेश-२ को ब्याटिंग क्रम धराशायी बन्न पुग्यो । जसपछि उसले ७३ रनको योगफलमै ७ विकेट गुमायो । एक किनारबाट निरन्तर विकेट गएता पनि अर्को किनार सम्हालेका दाशलाई सुवाष भण्डारीले आउट पार्दै गण्डकीको जित सुनिश्चित गराए ।
गण्डकीको बलिंगतर्फ कमल परियारले सर्वाधिक ५ विकेट लिए जुन क्रममा ५.५ ओभर बलिंग गर्दै २० रन खर्चिए । यस्तै, सुवाष भण्डारीले ३ ( ९-३-३०-३ ) तथा किरण पौडेलले २ विकेट हात पारे ।
यसअघि मुलपानी मैदानमा टस हारेर ब्याटिंग गरेको गण्डकी प्रदेशले ४३.४ ओभरमा सबै विकेट गुमाएर १५६ रन बनाउँदै प्रदेश-२ लाई जितको लागि १५७ रनको लक्ष्य प्रस्तुत गरेको थियो । गण्डकीको ब्याटिंगमा ओपनर अर्जुन कुमालले सर्वाधिक ४७ रन बनाए जुन क्रममा ८८ बलमा ७ चौका प्रहार गरे। संदेश सुनारले २६, सचिनराज अधिकारी र कमल परियारले समान १४ तथा प्रशान्त सिंहले १० रन बनाए। अतिरिक्तको रुपमा प्रदेश-२ ले २७ रन खर्चियो।
गण्डकीले ३६ रनमा पहिलो ४ विकेट गुमाएपछि पाँचौ विकेटको लागि अर्जुनले सचिनराजसंग ३९ रनको तथा छैठौं विकेटको लागि संदेशसंग ५० रनको साझेदारी गरेका थिए।
प्रदेश-२ को बलिंगमा कप्तान दायाँ हाते पेसर बिबेक यादवले सर्वाधिक ५ विकेट लिए जुन क्रममा ९ ओभरमा २ मेडन ओभर गर्दै २० रन खर्चिए। यस्तै अर्का पेसर गुल्सन झाले ३ विकेट ( ७.४-०-३१-३ ) लिए। अजय यादव र प्रदिप पासवानले समान एक विकेट लिए।
