- विकेटनेपाल, असोज २१
मलेसियामा जारि आईसीसी ट्वान्टी-२० विश्वकप छनौट एसिया (पूर्वी) प्रतियोगिता अन्तर्गत आफ्नो तेस्रो खेलमा थाइल्याण्डलाई १४० रन ( डी/एल मेथड ) ले पराजित गरेको छ।
खेलमा करन केसीले ब्याटिंग र बलिङ्ग दुवैमा योगदान दिए पछि प्लेयर अफ द म्याच चुनिएका छन्।
राष्ट्रिय टिमको लागि २०१५ देखि खेल्न थालेका करन दोश्रो पटक प्लेयर अफ द म्याच चुनिएका हुन्। यस अघि उनि आईसीसी बिश्व क्रिकेट लिग डिभिजन-२ अन्तर्गत क्यानडासंग चमत्कारिक अविजित ४२ रनको इनिंग खेल्दा प्लेयर अफ द म्याच चुनिएका थिए।
विस्फोटक ब्याटिंग
टस हारेर ब्याटिंग गरेको नेपालको माथिल्लो क्रमको ब्याट्सम्यानहरु लगातार आउट हुँदा आठौँ नम्बरमा विस्फोटक ब्याटिंग गर्दै करनले टिमको योगफल १७२ पुर्याएका थिए।
१६.२ ओभरमा पारस खड्का आउट भए पछि करन ब्याटिंगमा आउदा स्कोर १२१/६ ( १६.२ ओभर ) थियो जसपछि मात्र १४ बलमा स्कोरलाई उनले २० ओभरमा १७२ पुर्याईदिए।
यस क्रममा करनले ४० रन बनाउन १४ बलमा ४ छक्का र २ चौका प्रहार गरे। इनिंगको अन्तिम ओभरमा करनले लगातार ३ छक्का प्रहार गरेका थिए।
बलिङ्गमा पनि कमाल
बलिङ्गमा पनि करनले ३ विकेट लिंदा थाईल्याण्ड कमजोर बनेको थियो। १.५ ओभरमा मात्र ३ रन खर्चेर उनले उक्त विकेट हात पारेका थिए।
नेपालको जितमा करन पछि बलिङ्गमा सन्दिप लामिछानेले ५ विकेट ( ३-१-८-५ ) हात पारे भने ब्याटिंगमा शरद भेसावकरले ३४, दिपेन्द्र ऐरिले ३०, अनिल साहले २५ तथा बिनोद भण्डारीले १५ रन बनाए।
प्रतियोगिता अन्तर्गत नेपालले आगामी खेलमा मंगलबार भुटानसंग खेल्नेछ। ७ टिम सहभागी प्रतियोगिताको अंकतालिकामा उत्कृस्ट ३ भित्र पर्ने टिम २०२० टि-२० बिश्वकप एसिया छनौट प्रतियोगिता खेल्न छनौट हुनेछ।
