तीव्र गतिका बलर करण केसीले कीर्तिमानी प्रदर्शन गर्दा बिहिबार सम्पन्न खेलमा घरेलु टोलि नेपालले पपुवा न्यु गिनीलाई ३७ रनले पाखा लगाउदै जारि त्रिकोणात्मक ट्वान्टी २० शृंखलाको फाइनलमा प्रवेश गरेको छ । शृंखला अन्तर्गत यो नेपालको लगातार तेस्रो जित हो । यसअघि नेपालले पपुवा न्यु गिनीलाई नै १५ रनले तथा मलेसियालाई ६ विकेटले पराजित गरेको थियो ।
यो ट्वान्टी २० अन्तराष्ट्रियमा नेपालको ५० औं खेल समेत हो । यसबीच नेपालले २८ खेलमा जित निकालेको छ भने २१ खेलमा पराजित हुँदा १ खेल नतिजाविहिन टुंगिएको छ ।
करण ट्वान्टी २० अन्तराष्ट्रियमा ह्याट्रिक तथा एकै खेलमा ५ विकेट लिने पहिलो नेपाली खेलाडी बनेका छन् । ह्याट्रिक लिने क्रममा उनले २० औं ओभरको दोस्रो, तेस्रो र चौथौं बलमा पपुवा न्यु गिनीका तल्लो क्रमका ब्याटरको विकेट लिएका थिए ।
यस्तै, करण ट्वान्टी २० अन्तराष्ट्रियमा ५० विकेट हात पार्ने दोस्रो नेपाली खेलाडी समेत बनेका छन् । यसअघि नेपालबाट ट्वान्टी २० अन्तराष्ट्रियमा कप्तान सन्दिप लामिछानेले मात्र ५० विकेट लिएका छन् । उनले हालसम्म ३६ खेलमा सर्वाधिक ६८ विकेट लिएका छन् । करणको नाममा भने समान ३६ खेलमा ५४ विकेट छ ।
नेपाल फाइनलमा
कीर्तिपुरस्थित टियु क्रिकेट मैदानमा भएको खेलमा नेपालले ३७ रनको जित निकाल्दै फाइनलमा स्थान बनाएको छ । खेलमा २०४ रनको विशाल लक्ष्य पछ्याएको पपुवा न्यु गिनी २ बल बाँकी रहँदै १६६ खेलमा समेटियो ।
पपुवा न्यु गिनीको ब्याटिंगतर्फ चार्ल्स अमिनीले ४७ बलमा ९ चौकाको मद्धतमा सर्वाधिक ६२ रन बनाए । यस्तै, टोनी उराले ४३, सेसे बाउले २५ तथा नोर्मान भानुवाले १७ रन जोडे ।
नेपालको बलिंगतर्फ कीर्तिमान रचेका करण केसीले ३.४ ओभरमा ह्याट्रिकसहित २१ रन खर्चिएर ५ विकेट लिए । त्यस्तै, सोमपाल कामी र अविनास बोहोराले समान २ तथा कप्तान सन्दिप लामिछानेले १ विकेट हात पारे ।
यसअघि खेलमा टस हारेर ब्याटिंगको निम्तो पाएको नेपालले निर्धारित २० ओभरमा ७ विकेट गुमाएर २०३ रन बनाएको थियो । नेपालको ब्याटिंगतर्फ दिपेन्द्र सिंह ऐरीले ३३ बलमा ३ चौका र ४ छक्काको मद्धतमा सर्वाधिक ६६ रन बनाए । यस्तै, रोहित पौडेलले ४१ तथा ओपनर आशिफ शेखले ३८ रनको योगदान दिए ।
खेलमा राष्ट्रिय टोलीबाट डेब्यु गरेका मोहम्मद आदील आलमले विस्फोटक ब्याटिंग गर्दै ११ बलमा १ चौका र ३ छक्कासहित ३१ रन जोडे । आलमले नोसैना पोकैनाले गरेको १९ औं ओभरमा ४ छक्का र १ चौकासहित ३२ रन बटुलेका थिए ।
पपुवा न्यु गिनीको बलिंगतर्फ काबुवा मोरेले ४ ओभरमा २९ रन खर्चिएर सर्वाधिक ३ विकेट लिए । रिले हेकुरेले २ तथा नोसैना पोकैना र नोर्मान भानुवाले समान १ विकेट हात पारे ।
