काठमाडौं । फ्रेन्चाइज टिम कर्णाली याक्सले नेपाल प्रिमियर लिग (एनपिएल) को लागि आफ्नो लोगो सार्वजनिक गरेको छ ।
आयोजक हिमालयन बिल्डर्स एण्ड इन्जिनियर्सले सोमबार पत्रकार सम्मेलनबाट कर्णाली याक्सको लोगो सार्वजनिक गरेको हो ।
टिम र लोगो सार्वजनिक कार्यक्रममा बोल्दै कर्णालीका मालिक जनक दत्त खनालले कर्णालीको संस्कृति देश भरी फैलाउने उद्देश्यका साथै क्रिकेट विकासमा योगदान गर्न प्रतिबद्ध रहेको बताएका छन् । ‘टिम कर्णालीले प्रदेशको भावना र संस्कृतिको प्रतिनिधित्व गर्ने विश्वास लिएको छ । हामी युवा पुस्तालाई प्रेरित गर्छौं। कर्णाली प्रदेश नक्सामात्रै हैन दृढताको प्रतीक हो,’ उनले भने, ‘हामी नेपाली क्रिकेटको विकासमा योगदान गर्दै यस क्षेत्रको पहिचान प्रवद्र्धन गर्न प्रतिबद्ध छौं । कर्णाली अब क्रिकेट मैदानमा झल्किने छ । ’
कार्यक्रममा कर्णालको प्रतिनिधित्व गर्ने विशेष याकको प्रदर्शन गरिएको थियो ।
कर्णाली टिम यसअघि हिमालयन बिल्डर्स एण्ड इन्जिनियर्सले १ करोड ११ लाखमा खरिद गरिसकेको छ । यसको मार्की प्लेयरमा राष्ट्रिय क्रिकेट टोलीका अलराउन्डर सोमपाल कामी छन् ।
नेपाल क्रिकेट संघ (क्यान)ले पहिलो पटक आयोजना गर्ने प्रतियोगिता १५ मंसिरदेखि ६ पुससम्म आयोजना हुँदैछ ।
कार्यक्रममा प्रतिनिधिसभा सांसद ज्ञानेन्द्र शाही, बिनिता कठायत, मनिष झा, सोभिता गौतम तथा क्यानका सचिव पारस खड्का लगायतको सहभागिता रहेको थियो ।
